Shkup, 24 nëntor – Projekti “Mozaik” thuajse është zhdukur nga të gjitha kopshtet ku për vite me radhë u realizua me qëllim të mësohet gjuha dhe kultura e tjetrit përmes lojës. Nga kopshti “Fidani” në Çair thanë se ky projekt në bazë të planprogramit të posaçëm që kishte nuk funksionon tashmë disa vite. Siç tha drejtoresha Gzime Bakiu, zbatimi i projektit kishte efekte shumë pozitive prandaj është mirë të rikthehet nga Ministria e Politikës Sociale.
“Të them të drejtën ka disa vite me radhë që ky projekt nuk funksionon. Ne i kemi grupet siç kanë qenë edhe më herët grupet Mozaik në gjuhën shqipe dhe në gjuhën maqedonase. Mirëpo, atëherë grupin Mozaik ka funksionuar me tjetër plan program, investimi dhe materiali I nevojshëm për aktivitetet, çdo gjë ka qenë pjesë e projektit. Mirëpo, disa vite me radhë ai projekt nuk funksionin dhe ato grupet Mozaik që janë funksionojnë me plan programin e rregullt të kopshtit që e kemi”, tha Gzime Bakiu, drejtore e kopshtit “Fidani”.
Ministri i Politikës Sociale, Demografisë dhe Rinisë tha se nuk ka asnjë pengesë në realizimin e këtij projekti. Mirëpo, Limani tha se u mbetet prindërve të vendosin në cilën gjuhë do të mësojnë fëmijët e tyre.
“Në disa prej çerdheve private të cilat nuk dua t’i potencoj me emër, po, është praktike por kemi edhe raste ku kemi çerdhe të cilat janë të përziera por me grumbullimin e nënshkrimeve të prindërve kërkojnë që ato të ndahen. Edhe shqiptarët kërkojnë të ndahen. Nuk mund t’i hyj kësaj pjese sepse nuk jam përgjegjës dhe kompetentë, familja është ajo që përcakton fëmijën në cilën prej çerdheve do të shkoj dhe në cilën gjuhë fëmija i tij do të trajtohet atje”, tha Fatmir Limani, ministër I Politikës Sociale, Demografisë dhe Rinisë.
Projekti “Mozaik” ka të bëj me arsimin dhe edukimin modern multikulturor të fëmijëve parashkollorë në grupet etnikisht të përziera, edukimi i të cilëve bëhet në kombinim të disa gjuhëve: në gjuhën maqedonase, shqipe, turke dhe serbe. Gjatë periudhës që u zbatua, më shumë se një dekadë, projekti u realizua në 13 kopshte, në gjithsej 9 komuna të Maqedonisë me mbështetje të Organizatës Joqeveritare “Në kërkim të bazës së përbashkët”.
