“Supermen” është trendi më i ri në TikTok që ka fituar popullaritet në kohët e fundit. Përdoruesit krijojnë video ku imitojnë veprimet e lidhura me figurën e Superman-it. Por ky trend i ri ka shkaktuar lëndime, në shumë raste serioze, tek të rinjtë që janë bërë pjesë.
Video të tilla janë parë të realizohen dhe në shkollat në Shqipëri, ku nuk kanë munguar incidentet, si fraktura të dëmtuara dhe të nxira në pjesë të ndryshme të trupit.
“Për ne mosha pediatrike që janë më aktivët, shohim fraktura si të parakrahut, kavikulës, supit, gjymtyrëve të poshtme. Dëmtime mund të jenë nga më të thjeshtat, shembje që i themi ne në gjuhën popullore ose tek fraktura të kockave të gjata”, thotë Ilir Hasmuça, ortoped.
Pjesë e sfidës “Supermen”, janë bërë dhe të rritur. Nga ana mjekësore, pasojat e lëndimeve tek këto mosha mund të duan dhe muaj kohë rikuperimi.
“Tek fëmijët kanë një avantazh, që sistemi është në zhvillim e sipër dhe nuk kërkojmë ndonjëherë perfeksion. Sa më i vogël, aq më pak pasoja ka fraktura dhe sa më i rritur duhet një kujdes që frakturat të çohen në vendin e vet që të mos kemi pasoja në të ardhmen. Ka dhe raste që operohen”, tregon mjeku.
Kjo sfidë ka tërhequr vëmendjen e autoriteteve në shumë shtete, për të pasur kujdes të shtuar, si nga prindërit dhe punonjësit në shkolla për të parandaluar raste të tjera, që mund të çojnë në lëndime më serioze për jetën.
