Në takimin e prezantimit të programit “Urat e reja për Shqipërinë 2030”, me fokus zhvillimin e pronave publike nëpërmjet partneriteteve dhe sipërmarrjes private dhe shtetit, drejtoresha ekzekutive e Albanian Investment Corporation, Elira Kokona tha se pas një viti pune intensive, janë arritur rezultate që japin besim për të ecur përpara me vizion të qartë dhe projekte konkrete.
“Gjatë këtij viti kemi identifikuar prona dhe konsoliduar ato, kemi ideuar projekte investimi me një normë të lartë kthimi ekonomik, prej 25-35% edhe në skenarët më pesimistë, dhe kjo e vlerësuar nga ekspertë ndërkombëtarë. Kemi përzgjedhur përmes garave publike, projekte arkitekturore, kemi siguruar miratimin e lejeve të zhvillimit nga Këshilli Kombëtar i Territorit, për të bërë të mundur që propozimet tona të ishin konkrete dhe që kanë të bëjnë me mundësi konkrete biznesi.
Tani, përmes garave publike ndërkombëtare ne ofrojmë mundësi investimi në Shqipëri, pa burokraci, por me transparencë dhe proces të qartë garues. Këto projekte janë një mundësi reale biznesi, që jo vetëm ofron fitime për sipërmarrësit, por kontribuon në një të mirë publike që do t’i rezistojë kohës duke ndikuar drejtpërdrejtë në një mundësi sociale që do t’i rezistojë kohës”, tha Kokona.
Sipas drejtoreshës së AIC-së, “në projektet e këtyre muajve kemi zbuluar se pyetjet më të shpeshta nuk lidhen me mënyrën si do të aplikosh apo si të përfitosh një kontratë me AIC-në, pasi siç duket aktet e garave janë të qarta. Vetëm dy dokumente identifikimi dhe gjashtë dokumente duhet që të prezantohen në çdo lloj gjuhe të mundshme.
Shteti sillet si pronar dhe duhet të negociojë në zyrat më të mira avokatore vendase dhe të huaja. Ky është një fakt që nuk duhet të çudisë më askënd. Projekti i Marinës së Durrësit është një realitet i ditëve të sotme, por projektet e Rivierës do të jenë të së ardhmes dhe do të tregojnë se si AIC do të përfaqësojë palën shtet duke negociuar për pjesën më të favorshme për shtetin, me kapacitetet morale dhe të denja për t’u ulur në tryeza pune me biznesin, që e shohin Shqipërinë jo më si një vend të botës së tretë, por si një mundësi reale biznesi në qendër të Evropës”.
Sipas saj, “shembujt e vende të BE, Italia, Spanja, Austria, na japin mundësi të mësojmë dhe ndjekim modelet më të mira që ne të mos shpikim rrotën, por të jenë një mundësi e mirë dhe reale për bizneset dhe sipërmarrjen.
“Prona për zhvillim publik do të jetë vetëm 100% me funksion publik, ndërsa prona me zhvillim për sipërmarrjen do të jetë e menaxhuar nga biznesi privat. Mekanizmi që do të përdorim, në përqindjen që merr shteti në pjesën që ka funksion biznesi apo privat do të mund të përdoret si një monedhë për të mbuluar shpenzimet e godinës publike, duke dhënë një mundësi që në të dy lotet, të dy etnitetet si publik, dhe privat të kenë menaxhimin total të funksioneve përkatëse. Kjo i jep mundësi privatit që të mund të menaxhojë godinën dhe institucionit publik që do të menaxhojë 100% godinën që është në funksion publik”, theksoi Kokona.
Drejtoresha e AIC-së, në fjalën e saj gjatë takimit shtoi se rol në këtë proces, ka edhe rrjeti i ambasadorëve shqiptarë në botë, që po punojnë për tërheqjen e investitorëve të diasporës në projektet në Shqipëri. “Por, kjo nuk mjafton pa mbështetjen e ambasadave të huaja të akredituara në Shqipëri. Jemi besimplotë që lajmi i mirë për bërjen e biznesit në Shqipëri do të përhapet me shpejtësi si lajmet e tjera nga ambasadat e huaja të akredituara në vendin tonë. Jemi gati për projektet që u përmendën, por edhe rijetësimin e Pallatit të Brigadave, Pallatit të Kongreseve, Pallatin “Asllan Rusi” dhe shumë aseteve të tjera shtetërore që janë aty në pritje për një zhvillim të ri. “Albania all senses”, jo vetëm në turizëm, por në të gjitha senset. Një rol të rëndësishëm në këtë proces kanë edhe bankat, por edhe pronarët privatë rrotull pronave që do të zhvillohen nga AIC. Marrëdhëniet mes publikut dhe privatit janë si ato urat që kërkojnë kohë dhe përpjekje të përbashkët”, shtoi drejtoresha e AIC-së, Elira Kokona.
