Shkup, 29 janar – Të rinjtë e BDI-së kërkojnë dorëheqje urgjente nga zëvendëskryeministri dhe ministër për Marrëdhënie Ndërmjet Bashkësive Ivan Stoillkoviq dhe distancimi i qartë i Qeverisë “nga agjendat antishqiptare dhe antiperëndimore”.
“Ngremë zërin kundër provokimit të turpshëm që trondit të gjithë shqiptarët. Dekorata “Vojvoda Vuk” që i është dhënë zëvendëskryeministrit Stoillkoviq është një fyerje e rëndë për popullin shqiptar dhe një tallje e hapur me historinë tonë. Kjo është mbështetje e hapur për projektin “bota serbe” dhe agjendën ruse në rajon. Ky njeri nuk është ministër i paqes apo i bashkëjetesës, por një mjet për destabilizimin e projekteve që duan të rikthejnë frikën dhe përçarjet në Ballkan. A është kjo fytyra e Qeverisë që u premtoi qytetarëve barazi dhe integrim euroatlantik? Si mund të hesht kur një njeri që duhet të mbrojë Marrëveshjen e Ohrit shpërblehet për glorifikimin e atyre që masakruan popullsinë shqiptare në periudhën 1912 – 1918? Por kjo nuk mjaftoi, vizitat zyrtare dhe përqafimet me Milorad Dodik, udhëheqësin e projektit për ndarjen dhe shkatërrimin e rajonit, tregojnë hapur se për kë punon ky ministër dhe kush i udhëheq sot institucionet shtetërore”, theksoi Veton Sadiku, nënkryetar i degës rinore të BDI-së nga Gostivari.
Sipas Sadikut “ky shtet nuk guxon dhe nuk mund të jetë terren për glorifikimin e gjenocidit, si dhe përkthimin e projekteve të errëta të cilat duan t’i ndajnë popujt e rajonit”.
“Ne, rinia e BDI-së dhe të rinjtë shqiptarë, kërkojmë dorëheqjen e menjëhershme të ministrit dhe distancim të qartë të Qeverisë nga agjendat antishqiptare dhe antiperëndimore. Ne jemi këtu për të mbrojtur të ardhmen tonë dhe të drejtën për dinjitet. Nuk do të lejojmë që shqiptarët të nëpërkëmben nga ata që ende jetojnë në të kaluarën e errët”, theksoi Sadiku në një konferencë për media para Ministrisë për Marrëdhënie ndërmjet Bashkësive.
