I jepet sot lamtumira e fundit Kryepeshkopin Anastas Janullatos. Ceremonia mortore mbahet në katedralen “Ngjallja e Krishtit” në Tiranë, pas mbarimit të Liturgjisë Hyjnore. Kryepeshkopit do të vendoset për t’u prehur përjetësisht në vendin tonë, në një vend të posaçëm brenda Kishës.
Ceremonia do të drejtohet Patriarku Ekumenik i Kostandinopojës, Bartolomeu në katedralen “Ngjallja e Krishtit” në kryeqytet. Bartolomeu do të mbajë fjalimin e parë dhe do të drejtojë meshën.
Në ceremoninë mortore marrin pjesë liderët e Kishave Ortodokse në botë, krerët më të lartë të shtetit dhe politikës në Shqipëri, si edhe të Greqisë. I pranishëm do të jetë kryeministri grek, Mitsotakis me një delegacion të gjerë nga Athina, përfshirë 5 ministra të kabinetit të tij qeveritar, lideri i opozitës greke, por edhe Kryepeshkopi i Athinës.
Nga Vatikani pritet një delegacion i gjerë i drejtuar nga Sekretari i Shtetit, Pietro Parolin. Është konfirmuar gjithashtu edhe pjesëmarrja e Patriarkut të Izraelit Theofili i Jerusalemit; Kryepeshkopit të Greqisë Jeronimi; Patriarku i Qipros, i Aleksandrisë; i Bullgarisë, i Rumanisë etj.
Gjithashtu në ceremoni priten Kryepeshkopi dhe klerikë nga Polonia, drejtues të “Saint Egidio” në Itali; delegacion nga Këshilli Botëror i Kishave (institucion që përfshin të gjitha kishat, katolike, protestante apo ortodokse), përfaqësues nga unioni “Fetë për Paqen”, një delegacion nga kishat e Shteteve të Bashkuara të Amerikës etj.
Fjalim do të mbajnë edhe mbesa e Kryepeshkopit Anastas, si edhe dy kryeministrat Rama e Mitsotakis.
Agjenda e ceremonisë
Fjala e përmortshme e Tërëshenjtërisë së tij, Patriarkut Ekumenik, z. Bartholome
Fjala e përmortshme e Mbikëqyrësit të Fronit, hirësi Joanit, Mitropolit i Korçës,
Fjala e përmortshme e Kryetarit të Komisionit Qendror të Këshillit Botëror të Kishave, Bishop Heinrich Bedford-Strohm
Fjala e përmortshme, jashtë programit, e mbesës së Kryepeshkopit të ndjerë, znj. Roksani Janullatos
Fjala e përmortshme e Shkëlqesisë së tij, Kryeministrit të Greqisë, z. Kyriakos Mitsotakis,
Fjala e përmortshme e Shkëlqesisë së tij, Kryeministrit të Shqipërisë, z. Edi Rama.
Kryepeshkopi i Tiranës, Durrësit dhe i gjithë Shqipërisë, Anastas Janullatos, u nda nga jeta në moshën 95-vjeçare, ë 25 janar 2025 në spitalin “Evangelismos” në Athinë raporton A2 CNN, ku ishte i shtruar pas përkeqësimit të gjendjes së tij shëndetësore.
Prej vitit 1992 ai ka jetuar në Shqipëri, ku edhe ka drejtuar Kishën Ortodokse dhe gjithmonë e ka shprehur dëshirën që trupi i tij të prehet në vendin tonë.
Kryepeshkopi Anastas, ishte rindërtuesi dhe rigjallëruesi i Kishës Ortodokse Autoqefale të Shqipërisë, të cilën e ngriti tërësisht nga rrënojat pas rënies së regjimit ateist. Me vizionin dhe punën e tij, ai rindërtoi nga themelet jetën kishtare, ndërtoi qindra kisha, krijoi institucione arsimore dhe bamirëse, si dhe formoi një brez të ri klerikësh, duke ofruar një shërbesë të pandërprerë e sakrifikuese për më shumë se 33 vjet.
Janullatos ishte Kryepeshkopi i Kishës Ortodokse të Shqipërisë që prej vitit 1992. U nderua me 27 medalje e çmime dhe në vitin 2000 u propozua për Çmimin Nobel.
