Votuesit shqiptarë që jetojnë jashtë, për herë të parë kanë mundësi që këtë vit të marrin pjesë përmes votës në zgjedhjet parlamentare të 11 majit.
Sipas shifrave zyrtare të Komisionit Qendror të Zgjedhjeve, numri i votuesve nga jashtë të regjistruar ka arritur shifrën 128 756, janë shqyrtuar 155 671, ndërsa deri sot, në orën 09:30 janë miratuar 99 002 kërkesa.
Sipas të dhënave janë refuzuar 56 669 kërkesa, por këtu përfshihen edhe rastet kur një zgjedhësi aplikimi i është refuzuar më shumë se një herë.
Sipas gjinisë, përqindjen më të lartë të regjistruesve e kanë meshkujt, me 93 615 kërkesa, ndërsa femrat janë 64 043.
Kërkesat për regjistrime janë nga vende të ndryshme të botës. Numri më i lartë i kërkesave është regjistruar nga Italia me 59 978, e ndjekur nga Greqia me 42 800, Gjermania me 18 582, si dhe nga SHBA me 11 256.
Sa i takon kërkesave sipas qarqeve, numri më i lartë i aplikimeve është për qarkun e Tiranës me 30 613, më pas vijnë qarqet Fier me 21 717, Durrës me 16 699, Korçë me 16 185 etj.
Procesi për regjistrimin në Platformën Elektronike të Zgjedhësve (PER) ka filluar në 11 janar dhe do të zgjasë deri në 4 mars.
