Deputeti i Partisë Socialiste, Pandeli Majko deklaroi sot se kërkesa e opozitës për lejimin e votimit me pasaporta joshqiptare për shqiptarët që jetojnë e punojnë jashtë vendit, si dhe ajo për dhënien e të drejtës Komisionit Rregullator pranë Komisionit Qendror të Zgjedhjeve për miratim me shumicë të cilësuar të kësaj kërkese, lë hapësirë për të menduar se opozita po kërkon të bllokojë të drejtën e qytetarëve nga Shqipëria jashtë kufirit për të votuar.
“Kam shqetësim lidhur me kërkesën më të fundit të opozitës, e cila ndryshon thelbësisht rregullat e lojës në këtë moment në të cilin procesi zgjedhor është. Opozita ka propozuar një ndryshim interesant. Palët kanë rënë dakord që propozimet e opozitës të vlerësohen nga Komisioni Rregullator i KQZ-së. Komisioni Rregullator do të vendosë në mënyrë të paprecedent nëse do të lejohet që shtetasit tanë jashtë vendit të votojnë me pasaportë të huaj, me votim me katër vota, pra votim i cilësuar. Mua “më mban një erë” që nuk dua t’i vë emër”, deklaroi Majko.
Sepse, vijoi ai, nëse i lihet Komisionit Rregullator të vendosë për një fakt, i cili ndryshon thelbësisht rregullat e lojës, kjo do të jetë një arsye që votimi për shtetasit që banojnë jashtë vendit të bllokohet.
Sipas tij, do të ishte e papërgjegjshme që ky vendim të trokasë në dyert e Komisionit Rregullator.
“Përshëndes vendimin e Komisionit Rregullator që ka miratuar edhe fletën e votimit. Pyetja ime publike është se çfarë do të ndodhë me shpenzimet e realizuara nga KQZ, nëse ky Komision nuk do të ketë votat e nevojshme për të miratuar të drejtën e votës për shtetasit jashtë vendit. Kam përshtypjen se konsensusi i opozitës për t’ia kaluar çështjen Komisionit krijon një precedent të rrezikshëm. Sot që flasim mbi 100 mijë persona kanë aplikuar për të votuar nga jashtë vendit për të votuar në zgjedhjet e 12 majit. Po tejkalojmë një krizë nga një sallë me 140 veta në një grup njerëzish me pesë persona. Shpresoj që Komisioni Rregullator të mos jetë në nivelin që të marrë aktin e aventurës dhe të bllokojë të drejtën e mbi 100 mijë vetëve që kanë shprehur interes për të votuar”, tha Majko.
