Kryeministri Edi Rama në rubrikën “Sy m’sy” duke iu përgjigjur qytetarëve në rrjetet sociale, ka folur sërish sot për çështjen e 21 Janarit dhe pritshmëritë që ka shoqëria për të vendosur drejtësi për katër të vrarët në bulevard.
“Nuk dua të marr shumë kohë me këtë temë, kemi diskutuar shumë herë, sepse kishim një heshtje strategjike të gjatë më shumë se pesë vjet për t’i dhënë suport total institucioneve të reja të drejtësisë dhe për të krijuar një atmosferë që të paktën nga ana e pushtetit ekzekutiv të mos ndihej asnjë lloj trysnie, të asnjë lloj natyre, për shkak edhe të një fryme kritike që është e shëndetshme. Dhe tani që kjo heshtje strategjike ka dhënë si rezultat krijimin e një besimi te pavarësia, patjetër që do duhet të flasim për standardet, cilësinë, respektin e lirive dhe të drejtave kushtetuese, për barazinë reale përpara ligjit”, tha Rama.
Kryeministri theksoi se “përpara ligjit janë të barabartë të gjithë, edhe prokurorët, edhe të akuzuarit, edhe gjykatësit, dhe tërë të tjerët që e ndjekin këtë proces”.
“Kur vjen puna te 21 Janari, fajtorët i nxjerr pikërisht SPAK-u dhe Gjykata Speciale, nuk i nxjerr qeveria. Unë e kam me aq të vërtetë saqë me sa shoh ty dhe shumë të tjerëve si ty, nuk jua rrok as mendja sa me të vërtetë e kam këtë punë. Se po të mos e kisha me të vërtetë, e them pa asnjë dyshim që nuk do kishte SPAK fare, institucione të reja të drejtësisë, gjë që na ka bërë një shembull në vullnetin e luftës kundër korrupsionit në të gjithë rajonin”, u shpreh Rama.
Kryeministri Rama theksoi se në këtë drejtim, Shqipëria është më e përparuar krahasimisht me vendet e tjera të rajonit, ndërsa tha se “dihet botërisht se kur ka intensitet në këtë luftë ka edhe një perceptim se këtu nuk ka asgjë tjetër përveç korrupsionit dhe kjo është e pavërtetë”.
“Të dhënat e organizmave që na kanë monitoruar tregojnë që ka një ndryshim të madh te prokurimet publike, financat publike, administratën publike dhe ka një test. Çfarë them unë, çfarë thua ti, Vjosa, dhe të tjerët është relative, por çfarë Bashkimi Evropian konstaton në ecurinë e një vendi është absolute, sepse fokusohet në shifra dhe fakte dhe nuk të afron njeri në atë shtëpi nëse nuk i përgjigjesh kritereve, kushteve dhe standardeve që ka ajo shtëpi për të bërë pjesë të sajën”, vijoi Rama.
Kryeministri shtoi se në “Bashkimin Evropian nuk bën njeri krushqi nëse nuk ta “mat” mirë kokën me pe dhe nuk ta bën të gjithë inventarin e pajës që ke”.
