Shkup, 21 shkurt – Me rastin e 21 shkurtit – Ditës Ndërkombëtare të Gjuhës Amtare, Ministria për Marrëdhënie Ndërmjet Komuniteteve, në bashkëpunim me Drejtorinë për Zhvillimin dhe Avancimin e Arsimit në Gjuhët e Komuniteteve dhe Drejtorinë për Afirmimin dhe Avancimin e Kulturës së Komuniteteve, organizoi një ngjarje ku morën pjesë fituesit e çmimeve nga thirrja e shpallur për dorëzimin e veprave (poezi – prozë) të shkruara në gjuhën amtare nga nxënësit.
E drejta për të marrë pjesë në këtë thirrje iu dha të gjithë nxënësve nga klasa e gjashtë deri në të nëntën, me kusht që veprat të ishin të shkruara në gjuhën amtare të nxënësit (shqip, maqedonisht, turqisht, romisht, serbisht, boshnjakisht, vllahisht dhe/ose gjuhë të tjera), pavarësisht nëse kjo gjuhë është e përfaqësuar në mësimin e rregullt në shkollë. Temat e veprave ishin të zgjedhura lirshëm nga nxënësit, me kusht që të mos përmbanin elemente diskriminuese ndaj anëtarëve të komuniteteve të tjera, gjuhës së tyre apo besimit fetar.
Nxënësit më të suksesshëm dhe mentorët e tyre morën çertifikata mirënjohjeje dhe dhurata simbolike.
“Bota sot shënon Ditën Ndërkombëtare të Gjuhës Amtare – 21 Shkurtin, e cila u themelua nga Kombet e Bashkuara dhe UNESCO në vitin 1999, me qëllim të promovimit, ruajtjes dhe afirmimit të të gjitha gjuhëve që përdoren nga popujt në mbarë botën, si dhe për të mbështetur zbatimin e strategjive dhe politikave në favor të diversitetit gjuhësor në të gjitha pjesët e globit. Ky është edhe misioni ynë. Të ndërtojmë një shoqëri që respekton të drejtën e secilit për të folur dhe për të mësuar gjuhën amtare të komunitetit të tij, ndërkohë që punojmë për krijimin e politikave të barazisë, parandalimin e çdo forme diskriminimi, forcimin e veçorive kulturore dhe promovimin e bashkëjetesës në vendin tonë, i cili karakterizohet nga multietniciteti dhe multigjuhësia”, theksoi zëvendëskryeministri dhe ministri Ivan Stoilkoviq.
