Shkup, 21 shkurt – Një punonjëse shëndetësie në Ortopedi që deshi të mbetet anonime, ankohet se edhe pas 8 vitesh punë, ende nuk ka vendim. Shpreson se do të punësohet dhe nuk do të detyrohet që të largohet nga vendi për shkak se me pagën minimale që e merr mezi arrin që ta kalojë muajin.
-Kur nuk ke sigurim shëndetësor dhe pensional, stazhi nuk ec, kjo që është më e rëndësishmja për mua. Duke pasur parasysh moshën time, shpresoj se do të bëhet dhe do të qëndroj këtu.
-Sa është paga bazë?
-Pagë minimale. Të gjithë e dinë, në këtë kohë si është me pagën minimale, sa mundesh që të…
Dhe pikërisht për shkak të rasteve të tilla, vazhdimisht e më alarmante janë të dhënat se nga vendi për në vendet europiane largohen edhe mjekë edhe infermieret. Me këtë gjë, jo vetëm që po ulet kuadri mjekësor te ne, por për shkak të largimit të kuadrit profesional duhet të punësohet kuadër tjetër që nuk ka përvojë.
“Në nivel vjetor mesatarisht largohen 250 mjekë në vendet perëndimore europiane, ndërsa numri i kuadrove profesionale mjekësore me arsim të mesëm është dyfishuar, mbi 400-500 personel mjekësor me shkollë të mesme. Ndërsa në lidhje me numrin se sa na nevojitet kuadër, ne në Sindikatë bëmë një statistikë, d.m.th. numri është marramendës numri prej rreth 1.900 të kuadrit mjekësor me shkollë të mesme na mungon në gjithë territorin e Republikës së Maqedonisë, rreth 900 specialistë dhe mjekë të mjekësisë së përgjithshme”, tha Bobi Bojçevski.
Por sipas drejtorit të Fondit për sigurim shëndetësor, Sasho Klekovski, problemi me mungesën e mjekëve është fakti që ata nuk duan të punojnë në vendet më të vogla dhe nuk pranojnë të jenë mjekë amë. Si shembull e përmendi Dibrën ku ka mjekë të papunë, por që nuk pranojnë të punojnë atje.
“Ka edhe probleme kulturore, megjithatë në sistemin për shpërblime ka defekte në bazë të njerëzve që nuk janë të motivuar që të mbeten në vendet e vogla. Ja në Dibër ka 10 mjekë të papunësuar, ndërsa ka vende të zbrazëta pune si mjek amë. Por nuk duan njerëzit më që të punojnë si mjekë amë për shkak se ajo pozitë është e nënvlerësuar nga aspekti i të hollave”, tha Sasho Klekovski.
Ministri i shëndetësisë, Arben Taravari, konfirmoi se ka mungesë të mjekëve dhe përsëri premtoi se do të ketë punësime. Tha se gjatë muajve në vijim do të punësohen 300, ndërsa deri në fund të vitit edhe 300 specializantë tjerë.
