Shkup, 27 shkurt – Koalicioni shqiptarë që janë pjesë e pushtetit, VLEN, përmes një komunikate kanë njoftuar opinionin që akoma nuk kanë ndarë komunat si parti që përbëjnë koalicionin dhe as që kanë vendosur për kandidatët kush do të garojnë. Kjo është çështje delikate për faktin se kanë ngelur edhe pak muaj deri në zgjedhjet lokale. Pra, derisa VMRO po publikon emrat e kandidatëve VLEN akoma nuk kanë arritur marrëveshje se cilat komuna cilës parti i takojnë, shkruan Zhurnal.
VLEN asgjë definitive për komunat dhe emrat e kandidatëve –
Dje, gjatë ditës në media të caktuara ka qarkulluar një lajm për sa i përket disa emrave dhe ndarjeve të komunave për koalicion VLEN. I menjëhershëm ka qenë reagimi i këtij koalicionit duke i hedhur poshtë ato zëra, madje, i kanë cilësuar si spekulime.
“Përmes kësaj komunikate njoftojmë qytetarët dhe të gjithë mediat, që si Koalicion VLEN akoma nuk kemi ndarë komunat e as kandidatët që do të prijnë e fitojnë në komunat shqiptare. Prandaj, lusim për durim mediat dhe qytetarët për vëmendje që mos të bien pre e spekulimeve të ndryshme. E kuptojmë interesimin e lartë për këtë çështje të rëndësishme, dhe pikërisht kjo është arsyeja që nuk jemi duke nxituar. Koalicioni VLEN ka koordinim të vazhdueshëm, andaj për çdo çështje në kohë do të jetë i njoftuar opinioni me vendimet e Koalicionit. Kujtojmë që, pavarësisht se si do të jetë ndarja e komunave fitoren e kemi të përbashkët gjithandej, çdokund, në çdo komunë!”, thuhet në komunikatën e VLEN.
VLEN dhe VMRO ndihmojnë njëra tjetrën në zgjedhjet lokale –
Por, ajo që mund të thuhet qartë dhe sigurt është fakti që në zgjedhjet lokale të këtij viti partitë që janë pushtet, gjegjësisht, VMRO dhe VLEN do të bashkëpunojnë ngushtë në këto zgjedhje duke ndihmuar njëra tjetrën.
Partnerët e koalicionit qeveritar, VMRO DPMNE – VLEN planifikojnë paraqitje të përbashkët në zgjedhjet lokale të së vjeshtës. Kështu ka deklaruar edhe zëvendëskryeministri, Izet Mexhiti, gjatë një interviste për Kanal 5, duke potencuar se listat për këshilltarë do të jenë të veçanta, kurse planifikohet mbështetje e ndërsjellë për kandidatët për kryetar të Komunave, në rrethin e parë apo të dytë zgjedhor, varësisht marrëveshjes që do të arrihet.
“Për këshilltarë do të shkojmë veç e veç, për shkak të sistemit proporcional, derisa për Kryetar të Komunave është sistem shumice dhe atje ku do të kemi ne kandidatë do të mbështeten nga VMRO-DPMNE ose anasjelltas. Tani, nëse do të jetë në rrethin e parë apo të dytë zgjedhor, do ta vlerësojmë. Qëllimi është që koalicioni qeveritar të jetë fituesi absolut i zgjedhjeve të ardhshme lokale.”
Edhe pse është shprehur optimist se VLEN do të ketë rezultate më të mira zgjedhore se Fronti Evropian, sipas Mexhitit, kërkesa e tyre për zgjedhje të jashtëzakonshme është e pabazë. Sipas tij, BDI insiston për këtë skenar, vetëm që ta mbajë anëtarësinë partiake. Pas zgjedhjeve lokale, Mexhiti paralajmëroi se do të realizohet edhe plani i paralajmëruar që koalicioni VLEN të bëhet një parti politike. /Zhurnal.mk
