Ministrja e Shëndetësisë dhe Mbrojtjes Sociale, Albana Koçiu ka shpërndarë sot mesazhet falënderuese të disa qytetarëve që kanë marrë shërbim pranë Qendrës Spitalore Universitare “Nënë Tereza”, duke theksuar se çdo ditë, pacientët marrin trajtim në kushte bashkëkohore dhe standarde të larta.
Ministrja Koçiu pohon në një postim në rrjetet sociale, se “shëndetësia publike po ndryshon çdo ditë me investime dhe përmirësime që i vijnë në ndihmë çdo qytetari”.
Një prej pacienteve që vuan nga alergjia dhe merr prej kohësh trajtim spitalor pranë QSUNT, thotë se përvoja e saj me shërbimin pranë kësaj qendre spitalore është shumë e kënaqshme.
“Unë jam një paciente që vuaj nga alergjia dhe vendosa që ta trajtoja për shkak të pasojave që kisha. Mund të them nga përvoja ime që shërbimi në çdo instancë është marrë në mënyrën e duhur dhe doja ta shprehja, sepse jam pjesë e një trajtimi mjekësor të gjatë, që do të thotë se nuk është se e marrë shërimin vetëm një herë, por në mënyrë graduale dhe të vazhdueshme dhe kam pasur shansin që në dy vite të përballem me dyer të shumta në shtet dhe tek të gjitha kam marrë përgjigje pozitive. Dhe doja shumë ta shprehja dhe t’i inkurajoja të gjithë që ta provojnë shërbimin në shtet se do të mbeten të gjithë të kënaqur”, pohon qytetarja.
Një tjetër qytetare vlerëson në mesazhin e saj, ndryshimet që janë bërë në shëndetësi, duke shtuar se zgjedh shtetin për të marrë shërbimin spitalor sepse ka besim.
“Kur kam ardhur këtu në fillim kam qenë shumë keq, por e falënderoj shumë doktoreshë Adelën dhe stafin që ka ajo, që më kanë sjellë deri në këtë pikë. Jam shumë i kënaqur, çdo 15 ditë më ka dhënë ilaçet që të vazhdoj kurën”, thotë një tjetër pacient.
“Prej tre vitesh kurohem në spital, kam inflamacion të enëve të gjakut dhe vij shpesh sipas kërkesave që thotë doktori. Shërbimi na ka pëlqyer shumë. Doktori, infermierët janë të palodhur”, cilëson një qytetar tjetër në mesazhin e tij.
“Shërbimi super, qoftë në urgjencë, qoftë në kat të dytë, në kat të parë, jam shumë i kënaqur”, pohon një pacient i shtruar në QSUNT.
