Shkup, 23 mars – Tragjedia e rëndë në Koçani tronditi gjithë shoqërinë por trauma më të mëdha shkaktoi te familjet që në lëkurën e tyre ndjejnë dhimbjen nga humbja e më të dashurve të tyre. Psikologët thonë se këto familje por edhe të mbijetuarit duhet të marrin trajtim psikologjik menjëherë në mënyrë që të shmangen çrregullimet që vijnë nga stresi post traumatik.
“Pas çdo ndodhie të një tragjedie të madhe si kjo e Koçanit, por më herët që u përjetuan nga qytetarët tanë, dhimbja emocionale, përjetimi emocional i thellë tek familjarët është i madh, andaj mbështetje psikologjike është thelbësore në përballimin më të lehtë të këtyre situatave posttraumatike, gjë kjo që ndihmon në zbutjen e përjetimit të momenteve të shokut të parë traumatik. Është shumë e rëndësishme që mbështetja e parë psikologjike të jetë të dëgjuarit aktiv dhe empatik të përjetimit të mllefit dhe pranimit të saj, por procesi i pranimit të humbjes dhe zisë ka nevojë për një trajtim më afatgjatë. Në këto momente është me rëndësi që pas tejkalimit të kësaj situate të bëhet një vlerësim i gjendjes psikologjike tek të mbijetuarit dhe familjarët, që pastaj të mund të njëjtat të referohen në shërbime psikoterapeutike dhe psikiatrike gjë kjo që do ndihmojë në prevenimin e një çrregullimi të mundshëm të stresit post traumatik tek të mbijetuarit dhe familjarët e tyre”, tha Nebahate Ziberi, Psikologe.
Sipas Ziberit, të mbijetuarit dhe familjarët e prekur assesi nuk duhet të mbeten vetëm me mbështetjen e parë psikologjike, por të vazhdojnë me trajtimin psikologjik për një periudhë më të gjatë kohore.
“Mbështetja e parë psikologjike në këto situata është e domosdoshme por pasi të kalojë një periudhë, të vazhdohet në procesuimin dhe referimin e shërbimeve të specializuara për ta ri integruar individin e ri, për të mundur të rimëkëmbet dhe të rindërtojë stilin e tij të jetës me këtë ndryshim. Trajtimi është individual dhe secili organizëm e përjeton këtë ngjarje traumatike në mënyrën e tij personale”, shtoi Nebahate Ziberi, Psikologe.
Oda e Psikologëve të Maqedonisë së Veriut ofron mbështetjen e tyre në çdo moment për të mbijetuarit dhe familjarët apo gjithë të tjerët që kanë nevojë për një trajtim të këtillë posttraumatik.
