Është firmosur sot, Deklarata e Përbashkët mes Ministrisë së Shëndetësisë së Shtetit të Izraelit dhe Ministrisë së Shëndetësisë të Republikës së Shqipërisë, përmes së cilës hapet rruga për një partneritet më të fortë në kujdesin shëndetësor dhe shkëmbimin e eksperiencave në mjekësi.
Ministrja e Shëndetësisë dhe Mbrojtjes Sociale, Albana Koçiu tha se gjatë takimit, u diskutua mbi sfidat e sistemit shëndetësor dhe mundësitë për forcimin e bashkëpunimit mes dy vendeve, por sipas Koçiut fokus të veçantë, kishte edhe në specializimin për mjekët shqiptarë pranë qendrave spitalore izraelite, si dhe partneriteti me Sheba Medical Center.
Më herët, në kuadër të bashkëpunimit me Izraelin, Qendra Spitalore Universitare “Nënë Tereza” është binjakëzuar me qendrën spitalore më të madhe izraelite, “Sheba Medical Center”, një partneritet strategjik i cili do të kontribuojë në rritjen e standardeve të shërbimeve shëndetësore për qytetarët shqiptarë.
Marrëveshja e bashkëpunimit është nënshkruar në ambientet e MSHMS me praninë e ministres së Shëndetësisë dhe Mbrojtjes Sociale, Albana Koçiu dhe CEO-s së “Sheba Medical Hospital”, Yitshak Kreiss.
Ky bashkëpunim synon forcimin e kapaciteteve të shërbimit onkologjik, rritjen e standardeve dhe ofrimin e zgjidhjeve moderne për shëndetin e qytetarëve. Ky bashkëpunim i QSUNT me “Sheba Medical Center”, nis nga menaxhimi, te teknologjia, trajnimet dhe barnat.
