Zayn Malik anuloi koncertin e tij në Mexico City të premten mbrëma, pas një helmimi të rëndë nga ushqimi.
Këngëtari, i cili ka qenë në qendër të vëmendjes për performancat e tij të fundit, ndau një mesazh në Instagram Story duke shpjeguar situatën, vetëm disa orë para fillimit të shfaqjes.
“Më vjen shumë keq të them se nuk do të jem në gjendje të performoj sonte në Mexico City,” shkroi 32-vjeçari, shkruan DailyMail.
Ai vazhdoi duke shpjeguar se ishte shumë i sëmurë dhe trupi i tij nuk po ia lejonte të performonte, duke shprehur keqardhje për zhgënjimin që mund të kishte shkaktuar tek fansat e tij.
Për më tepër, Zayn përditësoi fansat disa orë më vonë, duke zbuluar se jo vetëm ai, por edhe shumë njerëz nga ekuipazhi i tij kishin përjetuar të njëjtin problem me helmimin nga ushqimi. Ai shtoi se po luftonte ende me pasojat e sëmundjes.
“Meksikë, të dua. Edhe pse unë dhe shumë nga ekuipazhi im morëm helmim të rëndë nga ushqimi, nuk është shaka – unë po luftoj ende”, shkroi ai.
Ish-këngëtari i One Direction kërkoi falje për fansat që kishin bileta për koncertin, duke theksuar se shfaqjet i kishin dhënë një ndjenjë të veçantë dhe të pafundme dashurie nga tifozët e tij.
Në shfaqjen e tij të së martës në Mexico City, Zayn emocionoi fansat kur performoi për herë të parë pas dhjetë vitesh këngën Night Changes nga One Direction.
Ky moment u shënua në përvjetorin e dhjetë të largimit të tij nga grupi, një ngjarje që e bëri të gjithë botën të flasë. Pas performancës, ai shprehu emocionet e tij duke thënë: “Nuk e kam kënduar këtë këngë për 10 vjet. Faleminderit, ishte e mahnitshme.”
Ky moment u bë viral në rrjete sociale, me fansat që shprehën krenarinë e tyre për Zayn dhe për këtë hapje të veçantë të karrierës së tij solo.
