Pas situatës së krijuar në aksin rrugor Pejë – Rugovë, ku rënia e gurëve ka bllokuar rrugën, ka rrezikuar jetën e qytetarëve dhe ka shkaktuar dëme në automjete, Prokuroria Themelore e Pejës ka hapur një rast për të verifikuar përgjegjësinë institucionale.
Kryeprokurorja Lumturije Vuçetaj ka ndërmarrë këtë hap pas raportimeve mediatike, ku përmes fotografive dhe video-incizimeve është pasqyruar rreziku i madh në këtë rrugë. Prokuroria do të shqyrtojë nëse institucionet përgjegjëse për mirëmbajtjen e rrugës kanë elemente të veprës penale “Shkaktimi i rrezikut të përgjithshëm”.
Lajmin e ka konfirmuar për Telegrafin zëdhënësi i Prokurorisë Themelore të Pejës, Shkodran Nikçi, i cili ka bërë të ditur se do të ndërmerren veprime ligjore për të verifikuar dhe sqaruar të gjitha përgjegjësitë penale të mundshme. Hetimet synojnë garantimin e sigurisë për qytetarët dhe shmangien e rreziqeve të mëtejshme.
