Kryeministri Edi Rama u është përgjigjur sot drejtpërdrejt pyetjeve të adresuara në platformat sociale.
Në rubrikën “Sy m’Sy” Rama replikoi me një qytetar, i cili u shpreh se bën video sikur Shqipëria është zhvilluar.
Rama i tha të fokusohet tek 11 maji, sepse do të jetë vendimtare për hyrjen e Shqipërisë në BE.
“Fokusohu se në datën 11 maj, nuk është çështja nëse të pëlqejnë apo jo videot e mia, madje s’është fare çështja të pëlqej unë apo s’të pëlqej unë, çështja është a do ta marrësh ti pasaportën evropiane apo nuk do ta marrësh, ti personalisht”, tha Rama.
“Pasaportën evropiane të Shqipërisë e merr vetëm nëse Shqipëria futet në BE dhe Shqipërinë në BE e fus vetëm unë me PS-në, nuk e fut dot njeri tjetër”, theksoi Rama.
“Dhe ky është interes, nuk është çështja të pëlqej s’të pëlqej. Interesi yt është që të kesh pasaportën evropiane, për të gjitha ato arsye që i kemi shpjeguar. Duke filluar që nga korridori atje në aeroport që mos të të mbajnë veç dhe të të thonë dil pak këtej se je shqiptar. Pastaj të shkosh tek polici dhe të të thotë polici: ku po shkon, sa lekë ke me vete, a ke hotel të rezervuar, sa do rrish, kur do ikësh? Që aty”, tha Rama.
“Të hysh në BE nga ai korridori ku hyjnë të gjithë evropianët thjesht duke treguar pasaportën dhe të kesh një pasaportë që ka të njëjtën vlerë si pasaportat e vendeve të tjera. Je në Francë ka të njëjtën vlerë si pasaporta franceze”, u shpreh kreu i qeverisë.
“Vetëm një gjë nuk bën dot ti në Francë me pasaportën shqiptare të BE-së, nuk zgjidhesh dot në parlamentin kombëtar. Aty do të duhet të kesh nënshtetësi franceze. Vetëm kaq, asnjë gjë tjetër nuk ndryshon”, iu drejtua Rama qytetarit.
