Deputetja e Partisë Demokratike, Ina Zhupa, njëkohësisht drejtuese politike për Sarandën, Delvinën, Konispolin dhe Finiqin, tha sot se zyra elektorale e Partisë Socialiste në Delvinë po shkel legjislacionin dhe duhet mbyllur.
“Ndodhem në qytetin e Delvinës, këtu janë ambientet e KZAZ-së për Bashkinë e Delvinës. Sipas legjislacionit zgjedhor çdo zyrë elektorale do të duhet të ketë një distancë të paktën 300 metra larg KZAZ-së dhe larg qendrave të votimit. Në këtë ambient do të jetë KZAZ-ja siç është aktualisht, dhe do të jenë edhe dy qendra votimi në ditën e zgjedhjeve”, tha Zhupa.
Sipas Zhupës, “Partia Socialiste, kandidatët e saj të listës së hapur, kanë shkelur legjislacionin zgjedhor dhe udhëzimin e Komisionerit Shtetëror të Zgjedhjeve duke hapur një zyrë elektorale jo më pak se 50 metra larg KZAZ-së”.
“Pra, sapo zbret shkallët e KZAZ-së t’i ke propagandën e Partisë Socialiste që pret votuesit ditën e zgjedhjeve apo administratën zgjedhore gjatë punës së tyre në KZAZ”, tha Zhupa.
“Kjo është e ndaluar nga ligji dhe i kërkojmë Komisionerit Shtetëror që menjëherë të marrë masat për mbylljen e kësaj zyre elektorale në qytetin e Delvinës”, nënvizoi deputetja e PD.
