Shkup, 4 prill – “Vetëm vitin e kaluar kemi pasur rreth 30 viktima këmbësorë dhe rreth 140 viktima në aksidente trafiku në të gjithë vendin, shifra shumë mbi mesataren evropiane. Jeta e njeriut nuk ka çmim. Rregullat e lojës që do të hedhim në letër do të duhet të respektohen në mënyrë të vazhdueshme nga të gjithë dhe përmes procedimeve ligjore nëpër institucione secili do të mbajë përgjegjësi në rast të shkeljes, mosrespektimit apo moszbatimit të tyre”.
Këtë e theksoi dje ministri i Punëve të Brendshme Pançe Toshkovski në debatin publik “Siguria e këmbësorëve – përgjegjësi e të gjithëve ne” në Qendrën për trajnime të MPB-së – Idrizovë, organizuar nga Këshilli republikan për siguri në komunikacionin rrugor dhe Fakulteti për siguri – Shkup.
Toshkovski theksoi se duhet qasje profesionale në ndryshimin e duhur të rregullores ligjore, e cila në një pjesë, për fat të keq sipas tij, nuk është adekuate për nevojat që të gjithë ne si qytetarë i kemi.
Ministri theksoi edhe një herë se MPB është duke punuar intensivisht në ndryshimet ligjore që duhet të realizojnë një projekt vendimtar që duhet të çojë në rrugë më të sigurta, trafik më të sigurt dhe qytetarë më të sigurt.
“Me zbatimin e projektit “Qyteti i sigurt” në Shkup, Kumanovë dhe Tetovë, e më pas edhe në territorin e gjithë vendit, besoj se në të ardhmen do të shpëtojmë shumë jetë njerëzore që i kemi humbur në të kaluarën”, theksoi në fund ministri Toshkovski.
