Një iPhone mund të bëhet shumë më i shtrenjtë falë tarifave të presidentit amerikan, Donald Trump.
Aksionet e teknologjisë së madhe janë goditur nga tarifat e reja të SHBA-së, por Apple është një prej kompanive më të goditura, duke humbur rreth 8 për qind.
Kompania prodhon shumicën e telefonave të saj në Kinë, e cila është goditur nga një tarifë prej 54 për qind, shkruan skynews.
Pyetja tani është nëse Apple do t’i kalojë tarifat e reja plotësisht tek konsumatorët. Nëse ata vendosin ta bëjnë këtë, analistët parashikojnë që iPhone e rinj mund të kushtojnë më shtrenjtë për 30-40 për qind.
Kjo do ta bënte një iPhone 16 Pro Max (me 1 terabajt hapësirë ruajtjeje dhe ekran 6.9 inç), i cili aktualisht shitet për 1599 dollarë, të kushtojë gati 2300 dollarë.
Si një nga kompanitë më të vlefshme në botë, humbjet e Apple, së bashku me gjigantët e tjerë si Nvidia dhe Amazon, kanë shkaktuar humbje masive të vlerës për aksionerët.
Kompani që përbëjnë indeksin S&P 500 janë në rrugën për të parë një humbje të përbashkët prej 1.8 trilion dollarë në vlerë të tregut të aksioneve në sesionin e sotëm.
Në terma dollarësh, kjo humbje do të ishte e katërta më e madhe në histori për një ditë të vetme për S&P 500, e kaluar vetëm nga tre ditët në mars 2020 kur pandemia e COVID-19 hodhi tregjet globale në një rënie të madhe.
