Agjutanti i Përgjithshëm i Gardës Kombëtare të Ajovës (GKA), Gjeneral Major Stephen Osborn, ka përfunduar vizitën e tij zyrtare në Forcën e Sigurisë së Kosovës (FSK), e cila u vlerësua si një dëshmi e fuqishme e marrëdhënieve të ngushta dhe bashkëpunimit të vazhdueshëm ndërmjet dy institucioneve ushtarake në kuadër të programit të partneritetit shtetëror.
Vizita e tij nisi me një takim të ngrohtë me Komandantin e FSK-së, Gjenerallejtënant Bashkim Jashari, ku të dy palët diskutuan mbi progresin e deritanishëm dhe mundësitë e zgjerimit të bashkëpunimit ndërmjet FSK-së dhe GKA-së. Në fokus të diskutimeve ishte përmirësimi i kapaciteteve operacionale të FSK-së dhe përgatitja për sfidat e sigurisë në nivel kombëtar dhe ndërkombëtar.
Sipas njoftimit të FSK-së, gjatë qëndrimit në Kosovë, Gjenerali Osborn vizitoi disa njësi kyçe të FSK-së. Një ndalesë e rëndësishme ishte Komanda e Logjistikës (KL), ku iu prezantuan zhvillimet e fundit në fushën logjistike, kapacitetet aktuale, sfidat dhe objektivat për të ardhmen. Kjo vizitë ishte një mundësi e mirë për të shkëmbyer përvoja dhe për të vlerësuar nevojat për mbështetje të mëtejshme teknike dhe profesionale.
Një tjetër pikë kulmore e vizitës ishte Qendra për Studime Universitare në Akademinë e Mbrojtjes, ku Gjenerali Osborn mbajti një fjalim frymëzues para kadetëve. Ai vlerësoi punën e Akademisë në përgatitjen e udhëheqësve të rinj ushtarakë dhe theksoi rëndësinë e edukimit të lartë për ndërtimin e një ushtrie profesionale dhe të përkushtuar ndaj misionit dhe vlerave demokratike.
Gjenerali Osborn vizitoi gjithashtu Regjimentin e Parë të Këmbësorisë, duke parë nga afër përgatitjet stërvitore që po zhvillohen në kuadër të planit vjetor të ushtrimeve. Në kuadër të vizitës, ai inspektoi edhe punimet në Aeroportin e Gjakovës dhe në Babaj të Bokës, ku po zhvillohet projekti i përbashkët me SHBA-të për ndërtimin e Qendrës së Mirëmbajtjes së automjeteve HMMWV, një projekt kyç për rritjen e kapaciteteve teknike të FSK-së.
Në Babaj të Bokës, Gjenerali Osborn pati rastin të vizitojë edhe zonat ku do të vendoset Divizioni 28 i ushtrisë amerikane për të marrë pjesë në ushtrimin shumëkombësh “Defender Europe 25/Immediate Response 25 (DE25/IR25)”. Ai gjithashtu inspektoi poligonin e stërvitjes ku pritet të zhvillohet ky ushtrim, duke theksuar rëndësinë e këtyre operacioneve të përbashkëta për ndërtimin e ndërveprueshmërisë ndërmjet ushtrive aleate dhe partnere.
Në përmbyllje të vizitës së tij, Gjenerali Osborn falënderoi Gjeneral Jasharin dhe të gjithë personelin e FSK-së për mikpritjen dhe profesionalizmin e treguar. Ai u shpreh i impresionuar me progresin e arritur nga FSK-ja dhe ritheksoi mbështetjen e vazhdueshme të Gardës Kombëtare të Ajovës në rrugëtimin strategjik të Kosovës drejt ndërtimit të një force të qëndrueshme, të aftë për t’i shërbyer vendit dhe për të kontribuar në sigurinë globale.
Vizita e Gjeneral Osborn-it përforcon edhe njëherë lidhjet e forta ndërmjet Kosovës dhe Shteteve të Bashkuara të Amerikës dhe dëshmon përkushtimin e përbashkët ndaj paqes, stabilitetit dhe zhvillimit të qëndrueshëm në rajon.
