Policia e Kosovës ka realizuar një operacion të gjerë në Kaçanik dhe një lokacion në Klinë, në kuadër të hetimeve për vrasjen e rreshterit të Policisë së Kosovës, Muhamed Lika.
Si rezultat i aksionit janë arrestuar shtatë persona të dyshuar, përfshirë edhe një ish-pjesëtar të Forcës së Sigurisë së Kosovës (FSK).
Në një konferencë për media, kryeprokurori i Ferizajt, Burim Çerkini, ka deklaruar se personat e arrestuar do të dërgohen në mbajtje dhe ndaj tyre do të ndiqen procedurat e mëtejshme hetimore.
“Sipas dyshimeve tona, motivi i kësaj vrasjeje lidhet me punën e viktimës si pjesëtar i Policisë së Kosovës”, ka deklaruar Çerkini.
Nga ana tjetër, drejtori i Policisë së Kosovës, Gazmend Hoxha, ka dhënë detaje për operacionin policor, duke bërë të ditur se janë bastisur nëntë lokacione – shumica në Kaçanik dhe një në komunën e Klinës.
“Janë arrestuar 7 persona të dyshuar për përfshirje në vrasjen e rreshterit. Gjatë operacionit janë sekuestruar dy vetura, fishekë, dylbi dhe dëshmi të tjera që do të shërbejnë në hetime”, u shpreh Hoxha.
Një detaj tronditës që u bë i ditur gjatë konferencës ishte fakti se njëri nga të arrestuarit sapo kishte mbushur 17 vjeç në ditën e operacionit.
