Shkup, 28 prill – Gjykimi për vrasjen e Vanjës dhe Pançes vazhdon sot në orën 10:00 në Gjykatën Themelore Penale në Shkup me dëshminë e të akuzuarit Lupço Palevski në pyetje të tërthorta nga Prokuroria dhe mbrojtja e të akuzuarve të tjerë.
Në deklaratën e tij në seancën e mëparshme dëgjimore, Palevski i kundërshtoi përsëri akuzat kundër tij, duke pretenduar se provat e prokurorisë janë të paplota dhe manipuluese.
Palevski ka mohuar çdo përfshirje në rrëmbimin dhe vrasjen e Vanjës dhe Pançes. Ai pohon se ditën e vrasjes së Vanjës ai ishte në bankë për të paguar faturat, pas së cilës shkoi në treg dhe më pas u kthye në selinë e partisë politike “Desna” ku pati takime me anëtarët e partisë. Palevski gjithashtu pohon se nuk e ka drejtuar automjetin “Citroen” të Zhezhovskit, as që ka qenë ndonjëherë në shtëpinë e tij.
“Motiv që ta bëj këtë vepër nuk kam, nuk kam pasur asnjëherë dhe nuk e kam kryer këtë vepër penale për të cilën më lexuat citat nga aktakuza dhe po më pyesni”, tha Palevski.
Sipas tij, provat në hetimin kundër tij janë falsifikim. Në mbrojtjen e tij, Palevski theksoi edhe, sipas tij, mospërputhje të tjera në hetim, veçanërisht në lidhje me video-incizimet e paraqitura nga prokuroria.
Avokati Jovica Strashevski, mbrojtësi tij, gjithashtu theksoi në një deklaratë për mediat se ka dallime të konsiderueshme midis provave të paraqitura dhe deklaratave të prokurorisë.
“Provat e paraqitura nga PTHP-ja dhe pyetjet e tyre drejtuar të akuzuarve tregojnë dallime të mëdha në lidhje me deklaratat dhe materialet e paraqitura”, tha Strashevski, duke theksuar se dëshmia e sotme e Palevskit është thelbësore për të vërtetuar këto mospërputhje.
Palevski është dëshmitari i fundit i cili duhet të dëshmojë, pasi më parë, përveç dëshmitarëve të Prokurorisë, ishte marrë në pyetje babai Aleksandar Gjorçevski, si dhe të akuzuarit e tjerë. I akuzuari Velibor Manev i sqaroi grabitjet dhe vrasjet e Vanjës dhe Pançes, duke theksuar se organizator ishte Lupço Palesvski. Boro Videvski e mohoi pjesëmarrjen e tij në ngjarje, përderisa, Vllatko Keshishev theksoi se ai nuk ka dëshmuar në të njëjtat, sepse shumë shpesh i ishte dhënë detyrë që të bëjë rojë.
Sipas akuzës, Lupço Palevski, Boro Videvski, Velibor Manev dhe Vllatko Keshishov, si dhe babai i vajzës, Aleksandar Gjorçevski, akuzohen se bashkë planifikuan grabitjen e vajzës 14-vjeçare me qëllim që të detyrojnë një anëtar të familjes së saj më të ngushtë të japë të holla si shpërblim. Përderisa grabitja e të dëmtuarit Pançe Zhezhovski në Veles ishte bërë me qëllim që ta detyrojnë që tua japë veturën “Citroen” që ta shfrytëzojnë për grabitje të fëmijës në Shkup.
E mitura Vanja dhe Pançe nga Velesi, të cilët ishin raportuar si të zhdukur më 27 dhe 24 nëntor, ishin gjetur të vdekur në afërsi të Shkupit dhe Velesit më 3 dhjetor 2023.
