Kryetari i Partisë Demokratike Sali Berisha zhvilloi sot një takim në një biznes fasonerie pranë autostradës Tiranë-Durrës, nga ku prezantoi dhe programin e koalicionit “PD – Aleanca për Shqipërinë Madhështore” për sipërmarrjen, me moton “Made in Albania”.
Gjatë fjalës së tij Berisha theksoi se “për të gjithë eksportet, ne garantojmë së pari, një bord që do kompensojë qindarkë për qindarkë rënien e euros, që është një faktor që dëmton shumë çdo sipërmarrës që prodhon për eksportin”.
“E dyta, ne do të ulim çmimin e energjisë nga 18 do të jetë 6 lekë. Do ta kemi më të ulëtin dhe kjo përbën një leverdi të mirë për biznesin”, u shpreh Berisha.
Berisha shtoi se “rënia e euros është një problem shumë i madh”. Berisha u ndal edhe te largimi i të rinjve dhe mungesa e krahut të punës.
“Kanë ikur mbi 600 e ca mijë të rinj në 10 vite. Krahu i punës dhe tregu i punës është jashtëzakonisht i rëndësishëm. Ne, edhe në këtë aspekt do kemi një bashkëpunim shumë të ngushtë me sipërmarrjen në mënyrë që të ketë një trajnim të vazhdueshëm”, tha Berisha.
Berisha shtoi se “shteti do të krijojë të gjithë lehtësirat fiskale dhe të tjera për këtë proces”.
“Do bëjmë një politikë demografike me të cilën synojmë të nxisim në maksimum lindjen e fëmijës së tretë, duke e marrë përsipër nga lindja gjer 23 vjeç. Do bëjmë gjithçka për të kthyer ata që kanë ikur, siç jeni kthyer ju, një histori e vërtetë suksesi dhe sot mbijetoni në kushte të vështira”, tha Berisha.
“Prodhimi është punësim, prodhimi është të ardhura, prodhimi është zhvillim dhe ne do bëjmë gjithçka për prodhimin”, nënvizoi Berisha.
