Romë, 8 maj – Italia është mik i vendosur i Republikës së Maqedonisë së Veriut dhe mbështetës i qëllimit tonë strategjik – anëtarësimit të plotfuqishëm në Bashkimin Evropian, theksoi kryetari i Kuvendit, Afrim Gashi në takimin me kryetarin e Dhomës së Poshtme të Republikës së Italisë, Lorenco Fontana, duke iu referuar dy rezolutave të miratuara në Dhomën e Deputetëve të Italisë.
Siç theksohet në kumtesën nga Shërbimi për shtyp i qeverisë, Gashi shprehu pritjen e tij që Këshilli i BE-së do të japë sinjal të qartë se fillimi i negociatave me Republikën e Maqedonisë së Veriut duhet të jetë më shumë se një imperativ për BE-në, veçanërisht duke pasur parasysh situatën e brishtë dhe delikate gjeopolitike. Ai e vlerësoi bashkëpunimin midis dy parlamenteve si dinamik, veçanërisht përmes Protokollit të Bashkëpunimit, i cili do të mundësojë shkëmbimin e përvojave, përmirësimin e njohurive dhe zgjerimin e vizioneve për punën parlamentare. Pa dyshim, një urë lidhëse midis dy vendeve është diaspora e shumtë në Itali, që numëron rreth 100.000, e cila është e vendosur dhe e vlerësuar mirë në Itali.
Në këtë kontekst, e nënvizoi rëndësinë e miratimit të Marrëveshjes së Sigurimit Social nga Italia.
Kryetari Fontana e konfirmoi mbështetjen e Italisë për integrimin evropian të Republikës së Maqedonisë së Veriut dhe nënvizoi se vendi tashmë ka bërë kompromise të mëdha në atë rrugë.
Shpreson se dyert e Bashkimit Evropian do të hapen sa më shpejt të jetë e mundur, sepse anëtarësimi në BE nuk është vetëm përfitim për aspirantët, por edhe për vetë BE-në.
Në kumtesën theksohet se bashkëbiseduesit ranë dakord se bashkëpunimi i shkëlqyer politik, si dhe bashkëpunimi dinamik ekonomik, ofrojnë hapësirë për thellim dhe zgjerim të mëtejshëm në të gjitha sferat me interes të ndërsjellë. Në këtë drejtim, ndërtimi dhe zhvillimi pasues i Korridorit Panevropian VIII dhe përfshirja në kuadrin e bashkëpunimit makrorajonal të BE-së duhet të mbetet përparësi, si dhe përfshirja në rrjetet e ndërlidhjes – infrastrukturë, energji, komunikime, të cilat janë thelbësore për zhvillimin e të gjithë rajonit të Ballkanit Perëndimor.
Në takimin me Fontanën morën pjesë edhe anëtarët e Grupit Parlamentar të Kuvendit të RMV-së për Bashkëpunim me Parlamentin e Republikës Italiane, deputetët Blagica Lasovska, Dimitar Kovaçevski dhe Mimoza Musa, si dhe Sekretarja e Përgjithshme e Kuvendit Marina Dimovska.
Në kuadër të vizitës zyrtare të Delegacionit Parlamentar në Republikën e Italisë, sekretarja e përgjithshme e Kuvendit, Marina Dimovska, u takua me Fabricio Kastaldi, sekretar i përgjithshëm i Dhomës së Deputetëve të Parlamentit të Republikës së Italisë. Siç u kumtua, Dimovska theksoi se Parlamenti i Maqedonisë synon vazhdimisht të rinovojë punën e tij në përputhje me trendet moderne dhe standardet parlamentare, sepse qëllimi i udhëheqjes dhe Shërbimit është që Parlamenti të jetë në të njëjtin nivel me parlamentet e vendeve evropiane.
Dimovska nënvizoi se takimi i sotëm mund të hapë kapitull të ri në bashkëpunimin midis shërbimeve të dy Dhomave Legjislative, përmes zbatimit të Protokollit të Bashkëpunimit midis Shërbimeve dhe shkëmbimit të përvojave dhe praktikave më të mira në fusha të përbashkëta me interes, siç janë përmirësimi i proceseve legjislative, digjitalizimi dhe zbatimi i inteligjencës artificiale në proceset legjislative.
Siç theksohet, Kastaldi ka thënë se Protokolli i Bashkëpunimit është i rëndësishëm edhe për Parlamentin e Italisë, veçanërisht pasi asnjë shërbim i vetëm parlamentar nuk mund t’i përballojë të gjitha sfidat i vetëm; çdo shërbim, pavarësisht sa i vjetër është parlamenti, duhet të synojë përmirësimin e rolit dhe profesionalizmit të tij nëpërmjet komunikimit dhe bashkëpunimit me shërbimet e parlamenteve të tjera. Kastaldi propozoi që zbatimi i Protokollit të modelohej sipas Protokolleve që Parlamenti i Italisë ka nënshkruar me disa parlamente evropiane.
Bashkëbiseduesit ranë dakord që duke konceptuar dhe konkretizuar aktivitetet që do të fillojnë në nivel shërbimi në periudhën e ardhshme, do të jetë e mundur të shkëmbehen përvoja dhe ekspertiza, të ndërtohen mbi njohuritë dhe të zgjerohet kujtesa institucionale e shërbimeve, gjë që është në përputhje me përpjekjet e Shërbimeve Parlamentare për t’u përballur me sukses me çdo sfidë në punën e tyre.
Mbrëmë, në Ambasadën e Republikës së Maqedonisë së Veriut në Romë u organizua një pritje, ku foli Kryetari Gashi. Në pritje morën pjesë studentë dhe profesorë nga Maqedonia, përfaqësues nga bizneset e vogla dhe të mesme, mbrojtja dhe siguria, feja dhe jeta shoqërore në Itali.
