Shkup, 8 maj – Grumbuj mushkonjash në Urën e Gurit në Shkup. Qytetarët me mënyrat e veta mbrohen nga insektet. Qyteti i Shkupit arsyetohet se për t’u bërë dezinsektimi duhet të ketë kushte të përshtatshme.
“Qytetarët nuk mbulojnë fytyrën shkaku i kamerave, nuk është ky problemi por problemi është që mbi Urën e Gurit në Shkup, së fundmi janë paraqitur mushkonja të shumta nga të cilat është bërë sfidë në vete për të kaluar këtë urë në Shkup”, deklaroi Avni Tahiri, gazetar.
“Nuk e mbulon fytyrën shkaku i kamerave apo? Jo, për cilën arsyeje? Shkaku i insekteve që janë gjithandej”, tha një qytetar.
Përderisa disa qytetarë kishin mbuluar fytyrën që të mbrohen nga insektet, disa të tjerë largojnë insektet me duar apo kapela.
“Kopsht zoologjik, as ti mos rri këtu”, u shpreh një tjetër qytetar.
“Kemi probleme me insektet”, tha një qytetare.
“E frikshme, pa asnjë koment tjetër”, u shpreh një tjetër qytetare.
“Katastrofë, katastrofë, shumë mushkonja”, theksoi një qytetar.
Si e komenton këtë pamjen me mushkonjat?
“Duhet të stërpiken”, u përgjigj një qytetar.
Nga qytetit i Shkupit thonë se pas raportimit nga Televizioni Alsat, inspektorë nga Inspektorati i Qytetit të Shkupit menjëherë shkuan në terren, ku sipas tyre nuk është konstatuar pamje tronditëse e mushkonjave në Urën e Gurit. Ndërsa sa i përket stërpikjes kundër insekteve, nga atje thonë se sapo të plotësohen kushtet e motit, do të fillojë stërpikja ajrore.
“Që të ekzistojnë kushtet për kryerjen e dezinsektimit, janë të nevojshme kushte të përshtatshme atmosferike, pra moti duhet të jetë i qëndrueshëm, jo me shi, jo me erë dhe të mos ketë temperaturë më të ulët se 12 gradë Celsius. Procedura e shërbimit të dezinsektimit për trajtimin ajror është kryer dhe sapo të kemi kushte të motit, do të realizohet edhe trajtimi ajror”, thonë nga Qyteti i Shkupit.
Sipas Qytetit të Shkupit, dezinsektim behët çdo vit, duke filluar nga muaji prill apo maj dhe zhvillohet në 7 faza. Deri në plotësimin e kushteve atmosferike që të realizohet stërpikja në Shkup, për të kaluar Urën e Gurit, qytetarët do të duhet të pajisen vetë me sprej kundër insekteve.
