Shkup, 8 maj – Kryetari i komunës së Çairit Visar Ganiu vazhdon angazhimin në fushën e arsimit në shkollat fillore që gravitojnë në këtë komunë. Ganiu së bashku me drejtoreshën e shkollës fillore “Hasan Prishtina” promovuan bibliotekën shkollore, investim ky i komunës së Çairit.
Postimi i plotë:
Sot pata kënaqësinë të vizitoj Shkollën Fillore Komunale “Hasan Prishtina”, ku së bashku me drejtoreshën znj. Esma Fazlija promovuam hapësirën e re të bibliotekës shkollore – një investim i realizuar nga Komuna e Çairit në funksion të përmirësimit të kushteve mësimore dhe qasjes në literaturë cilësore për nxënësit tanë.
Biblioteka është e pajisur me 5.511 tituj të rinj dhe u shërben 1.162 nxënësve të kësaj shkolle, duke u kthyer në një hapësirë të rëndësishme të dijes, leximit dhe zhvillimit intelektual. Ne do të vazhdojmë të investojmë në arsim, sepse besojmë se themeli më i fortë i së ardhmes është edukimi i mirëfilltë.
