Kryeministri, Edi Rama dhe ai i Britanisë së Madhe, Kier Starmer në një konferencë për shtyp kanë folur në lidhje me samitin evropian që do të mbahet të premten në Tiranë, ndërsa u janë përgjigjur edhe pyetjeve të gazetarëve lidhur me emigracionin.
Rama dhe Starmer u pyetën nga një gazetar britanik nëse do ketë marrëveshje të ngjashme si me Italinë për kampe emigrante, ku kreu i qeverisë u përgjigje se nuk do të ketë.
Më tej vazhdoi me batutë se ‘jemi besnikë martesës me Italinë’. Ndër të tjera Rama tha se vende të tjera e kanë propozuar, por që u ka thënë ‘jo’, raporton Tch.
“Kam qenë i qartë qysh prej ditës së parë që kur nisëm procesin me Italinë, ishte një marrëveshje e vetme me Italinë për shkak marrëdhënies sonë të veçantë, por edhe për shkak të situatës gjeografike që është mjaft kuptimplotë. Për të qenë shumë i sinqertë me ju, janë kanë kërkuar shumë vende dhe u kemi thënë jo. Jemi besnikë ndaj martesës me Italinë dhe pjesa tjetër është dashuri”, tha kryeministri.
Ndërsa, kryeministri i Mbretërisë së Bashkuar u shpreh “Po e diskutojmë si çështje me një sërë shtetesh, e shoh si çështje novatore dhe të rëndësishme, është në përputhje me punën që ne kemi bërë edhe për zbatimin e ligjit, marrëveshjet që kemi për kthimet. Ajo që dua të bëj është të shtoj këto qendra kthimi. Qeveria e mëparshme ka bërë një eksperiment me kufijtë e hapura dhe nuk kanë ekzaminuar kërkesat për azil. Shumë prej tyre mbahen sepse nuk merrnin përgjigje, këto ishin paratë e tatimpaguesit dhe kjo është situata skandaloze që ne kemi gjetur. Puna që kemi bërë me Shqipërinë është jetike. Më vjen mirë që kemi përveshur mangët dhe kemi kthyer 24 mijë persona që kanë ardhur në mënyrë të paligjshme”.
