Shkup, 21 maj – Me një hapje modeste dhe me një qëllim të pastër – për të përcjellë një mesazh paqeje, kujtese dhe solidariteti – sot, si nikoqirë, organizuam në Parkun “Ukraina” të Komunës së Çairit vendosjen e skulpturës “Kujtim i hidhur i fëmijërisë”.
Këtë iniciativë e realizuam në bashkëpunim me Ambasadën e Ukrainës në Shkup dhe me pjesëmarrjen e Ambasadores, znj. Larisa Dir, e cila me praninë dhe fjalën e saj i dha ngjarjes një vlerë të veçantë, si shenjë e miqësisë së sinqertë dhe e respektit të ndërsjellë ndërmjet popujve tanë.
Kjo vepër artistike është një homazh për fëmijët viktima të Holodomorit – urisë së viteve 1932–1933 në Ukrainë – dhe një kujtesë e fuqishme për pasojat tragjike që sjellin luftërat dhe padrejtësitë. Përmes kësaj skulpture, Parku “Ukraina” merr një dimension të ri: atë të reflektimit, kujtesës dhe ndërgjegjes kolektive.
Me këtë akt simbolik, riafirmuam angazhimin tonë për të qenë gjithmonë në anën e vlerave humane.
