Raportuesi për Shqipërinë në Parlamentin Evropian, Andreas Schieder, në një intervistë për rrjetin televiziv ballkanik “Insider”, vlerëson vullnetin politik të Shqipërisë për reformat e integrimit.
“Shqipëria ka një plan ambicioz jo vetëm për hapjen e grupkapitujve, por edhe për mbylljen e tyre deri në vitin 2027. Duhet të them se procesi i hapjes së kapitujve është i rëndësishëm, por mbyllja e tyre është akoma më e rëndësishme. Zbatimi i reformave është edhe më i vështirë, por shqiptarët janë shumë të përkushtuar politikisht për të ecur më shpejt përpara”, tha Andreas Schieder, reporter për Shqipërinë në PE.
Schieder duke folur për reformën në drejtësi thekson se Shqipëria tashmë ka një sistem gjyqësor modern, që po heton njerëz nga të gjitha partitë politike.
“Në Shqipëri kanë bërë një reformë jashtëzakonisht të vështirë, por tashmë kanë një sistem gjyqësor modern. Ata kanë ngritur SPAK-un që po heton njerëz nga të gjitha partitë politike, ata janë hetuar, madje disa kanë përfunduar në burg”, tha Andreas Shcieder, reporter për Shqipërinë në PE.
Schieder thekson se situata ekonomike në rajon është e ngjashme, por dallimi qëndron tek qeverisja dhe vullneti politik për reforma.
“Të gjithë në rajon, serb, malazez, shqiptarë, maqedonas, duan të punojnë shumë, të gjithë duan t’i dërgojnë fëmijët e tyre në shkolla të mira. Aty ka njerëz të guximshëm por dallimi mes këtyre shteteve është tek vullneti politik për reforma në qeverisje”, tha Andreas Shcieder, reporter për Shqipërinë në PE.
