Të premten, disa maturantë kanë festuar përfundimin e shkollës me flamuj dhe këngë në sheshin “Car Llazar” në veri të Mitrovicës.
Gjatë festimeve, janë shënuar disa provokime nga ana e maturantëve serbë, por Policia e Kosovës ka reaguar menjëherë për të parandaluar përshkallëzimin e situatës.
Analisti politik, Driton Tali, në një prononcim për “Bota sot”, ka thënë se rinia serbe është produkt i një kulture hegjemoniste që daton që nga shekulli XIX dhe ka sjellë luftëra e gjenocide.
Sipas tij, festimet e tyre të maturës duhen parë në këtë kontekst.
Tutje thotë, se Kosova ka kapacitete të kufizuara për t’iu kundërvënë kësaj kulture dhe për sa kohë ekziston “kjo Serbi”, tensionet do të vazhdojnë.
“Rinia serbe, dhe jo vetëm në Kosovë por gjithandej, janë produkt i kësaj paradigme kulturore hegjemoniste serbe, të kultivuar që nga shekulli 19. Paradigmë e cila prodhoi shumë luftëra e gjenocide në këtë anë të botës.
Andaj atë “festim mature” duhet ta shikojmë nga kjo dioptri.
Fatkeqësisht ne, Kosova, nuk mundemi të bëjmë më tepër se sa që po bëjmë. Cilido udhëheqës i Kosovës karshi cilido udhëheqësi të Serbisë është i pamundshëm në këtë aspekt.
Thënë ndryshe, derisa të ekzistojë “kjo Serbi” neve do ballafaqohemi me situata të ngjashme”, thotë ai.
Tali apelon që organet e sigurisë së Kosovës të veprojnë me gjakftohtësi dhe në përputhje me ligjin, pavarësisht provokimeve.
Sipas tij, ndryshimi i situatës varet nga demokratizimi i Serbisë, që ende mbetet larg, ndonëse ka disa shenja të hershme të sfidimit të Vuçiqit. Për sa kohë Serbia mbetet në këtë gjendje, i gjithë Ballkani do të vuajë pasojat.
“Shih për këtë, organet e sigurisë së Kosovës duhet ta ruajnë gjakftohtësinë e tyre para se gjithash kur ballafaqohen me situata të ngjashme dhe të veprojnë strikt konform ligjit duke i ikur cilido provokim dhe kontrollu temperamentin e tyre.
Nuk e kanë lehtë por ndryshe nuk bënë hiç e ma hiç.
Fatkeqësisht, kështu do të jetë derisa “kjo Serbi” nuk fillon të ndryshojë pozitivisht – derisa nuk fillon të demokratizohet.
Ndonëse, kohën e fundit kanë filluar disa lëvizje pozitive të ndërmeren në atë drejtim, ku shihet se Vuçiç, si tutor i hegjemonizmit serb, është kah sfidohet nga disa grupe që kanë qasje tjetër, por ende është herët të pritet për ndonjë ndryshim të theksuar në “modelin kuturor” ekzistues të shoqërisë serbe.
Dhe “derisa Serbia të jetë e sëmurë i tërë Ballkani do të kollitet”, përfundon ai për gazetën.
