Një 25-vjeçar shqiptar është vënë nën akuzë nga autoritetet federale amerikane pasi u zbulua se ishte përfshirë në një martesë të rreme me qëllim përfitimin e dokumenteve të qëndrimit në SHBA.
I riu, Elvis Harizaj, kishte hyrë në Shtetet e Bashkuara me vizë studenti, por më pas ishte martuar me 27-vjeçaren Natasha Flores, shtetase amerikane nga Newark, në vitin 2021, në përpjekje për të legalizuar qëndrimin e tij përmes martesës.
Sipas autoriteteve, dyshimet lindën pas një hetimi të nisur nga shërbimet e emigracionit dhe sigurisë, të cilat konstatuan mospërputhje të mëdha në deklaratat e dy të martuarve. Harizaj dhe Flores u morën në pyetje veçmas dhe hetuesit vunë re se përgjigjet e tyre lidhur me jetën bashkëshortore nuk përputheshin në shumë raste.
Hetimi zbuloi se çifti nuk jetonte bashkë dhe se Natasha Flores kishte qenë e martuar më parë me një shtetas brazilian, për të cilin gjithashtu dyshohet se kishte përdorur të njëjtën skemë. Edhe pse ajo mohoi gjithçka, faktet e mbledhura sugjeruan të kundërtën.
Të dy personat janë tashmë të akuzuar për mashtrim dhe keqpërdorim të ligjeve të emigracionit. Harizaj ka pranuar pjesëmarrjen në skemë, ndërsa për Flores, nëse shpallet fajtore, rrezikon deri në 5 vite burg dhe një gjobë deri në 250 mijë dollarë.
Rasti ka tërhequr vëmendjen e mediave lokale, pasi vjen në një periudhë kur autoritetet amerikane kanë intensifikuar kontrollet ndaj martesave të dyshimta, si pjesë e luftës kundër emigracionit të paligjshëm dhe mashtrimeve me dokumentacion.
