Shkup, 3 mars – Tetë muaj para mbajtjes së zgjedhjeve lokale, Fronti Evropian ka filluar konsultimet mes partive nëse do të garojnë krah për krah njëri-tjetrit, sikurse në parlamentaret e fundit apo do të ketë një ndarje mes tyre për rajonet me shumicë shqiptare, si për kryetarë ashtu edhe për këshilltarë komunalë.
Në opinion qarkullojnë zëra të ndryshëm që pas daljes së Menduh Thaçi, mbetet e paqartë nëse Fronti do të vazhdojë ti dalë ballë edhe kërkesave nga brenda partnerëve.
Për momentin, nuk ka një akord mes partive, por burime nga palët thonë për ALSAT se fundi i muajit pritet të konkretizojë dinamikën e takimeve dhe ndarjeve të rajoneve dhe kandidatëve.
Siç mëson ALSAT, Aleanca për Shqiptarët do të kërkojë nga BDI-ja që të kenë kandidat në çdo zonë zgjedhore. Megjithatë, mbetet ende e paqartë se cilat komuna do të synohen edhe pse ASH nuk dëshiron të heqë dorë nga komuna të cilat i kishte fituar në zgjedhjet e kaluara lokale, siç është Vrapçishti.
Nga ana tjetër partitë e tjera më të vogla të Frontit, si duket nuk kanë oreks për të kërkuar kryetarë komunash ndërsa fatin e tyre do ta kërkojnë përmes listave për këshilltarë komunalë.
Jo zyrtarisht, BDI-ja është duke luajtur me dy karta, njëra prej të cilave të testojë veten e vetme në zgjedhje, edhe pse në nivel të Frontit, sikurse edhe pati deklaruar gjatë javës së fundit, do të preferonte bojkotimin total të zgjedhjeve. Këtë qëndrim, BDI-ja e mbështet në bazë të vendimit që do të dalë nga Kushtetuesja rreth gjuhës shqipe.
Për më 20 mars është caktuar seanca përgatitore dhe debati për të. Ndërkohë që për një vendim përfundimtar, nuk ka një datë nëse do të lidhej me tetorin e zgjedhjeve lokale./ Alsat.mk
