Kumanovë, 12 maj – Anëtari i kryesisë qendrore të ASH krahu i Taravarit, Lulzim Aliti përmes një postimi në rrjetet sociale ka thumbuar Taravarin duke bërë të ditur se nuk mbështet vendimet e tij për të shkuar në prehër të BDI dhe të largohet nga Qeveria, përcjell zhurnal.mk.
“Largimi nga Qeveria për t’u bashkuar me BDI-në nuk është kompromis politik por tradhti ndaj aspiratave të shqiptarëve për ndryshim.
Pazari për koalicionin e ardhshëm mes Aleancës së Arben Taravarit dhe BDI-së së Ali Ahmetit është një sekret publik. Tashmë edhe zogjtë e malit e dinë këtë gjë.
Nuk ka asnjë justifikim për bashkëpunim me një BDI të pareformuar. Nuk mund të reformosh një strukturë që ka degraduar çdo vlerë të përfaqësimit shqiptar. Të bashkëpunosh me BDI-në sot do të thotë të amnistosh korrupsionin, të legalizosh kapjen e institucioneve, të mbyllësh sytë para varfërisë në rajonet shqiptare dhe të heshtësh përballë padrejtësive.
Shqiptarët kanë kërkuar ndryshim, jo përsëritje të turpshme të gabimeve të së kaluarës, jo pazare me ata që kanë shkelur dinjitetin e shqiptarëve për përfitime personale.
Si anëtar i Kryesisë Qendrore, unë do të vazhdoj rrugën tonë të drejtë: kundër korrupsionit dhe për zbardhjen e plotë të vrasjeve të Komandantëve dhe rasteve të montuara politike!
Ftoj të gjithë aktivistët e sinqertë të Aleancës të qëndrojnë në këtë rrugë. Të vazhdojmë bashkë betejën politike për ndryshim, që padrejtësitë dhe krimet që na kanë ndjekur për vite të tëra nga njerëzit e listave të zeza, të korruptuarit dhe të kriminalizuarit, të mos përsëriten më kurrë!”, ka shkruar Aliti, transmeton zhurnal.mk
