Shkup, 8 tetor, argument.mk/ – Maqedoninë e Veriut nga nesër deri në mesin e javës së ardhshme e pret mot i ndryshueshëm dhe i paqëndrueshëm, nën ndikimin e aktivitetit ciklonik.
Gjatë kësaj periudhe priten reshje të herëpashershme shiu, të cilat në disa zona do të jenë më të dendura. Në total pritet të bien mbi 20 litra shi për metër katror, ndërsa reshjet më intensive parashikohen për të dielën.
Në nivel lokal, proceset atmosferike do të jenë më të fuqishme, me mundësi për stuhi të shoqëruara me reshje të rrëmbyeshme shiu, erë të fortë dhe bubullima.
Të martën pritet të mbërrijë një valë më e ftohtë ajrore, për shkak të së cilës në malet më të larta reshjet e shiut do të kalojnë në borë.
Edhe në Shkup, nga nesër deri në mesin e javës së ardhshme, moti do të jetë me vranësira të ndryshueshme dhe me reshje të herëpashershme shiu. Në disa pjesë të fushëgropës së Shkupit, reshjet lokalisht do të jenë më të dendura, ndërsa nuk përjashtohet mundësia edhe për bubullima të rralla.
Nga e hëna do të fryjë erë e moderuar deri e përforcuar nga drejtimi verior, e cila do të sjellë ulje të temperaturave dhe freskim të ndjeshëm të motit.
Autoritetet u bëjnë thirrje qytetarëve që gjatë ditëve në vijim të jenë të përgatitur për mot të ndryshueshëm dhe të paqëndrueshëm, veçanërisht gjatë periudhave me reshje më intensive dhe erëra të përforcuara.https://argument.mk/
