Shkup, 23 korrik – Erë e keqe kundërmon nga koshat e plehrave për shkak të mbeturinave të grumbulluara, të cilat akoma nuk ishin pastruar nga Ndërmarrja Publike “Higjiena Komunale” në momentin që ekipi i Alsat ishte në terren. Disa nga banorët e një lagjeje të Komunës së Butelit ankohen se koshat nuk zbrazen rregullisht pavarësisht se kjo duhet të ndodhë dy herë në javë.
“Tashmë një javë jam këtu vetëm një herë i kanë marrë më duket. Unë shpesh herë kam bë video privat me telefon, mbeturina plot afër shkollës. Nëse nuk mblidhen dy javë mund të përhapet ndonjë epidemi, ndonjë sëmundje”, tha një qytetar.
“Është vështirë të fajësosh ose cilin ta fajësosh mirëpo nuk është mirë, shiko koshat janë plot megjithatë njerëzit punojnë, siç i shoh. Në këto temperatura të larta shumë gjëra janë problem, shëndeti i njerëzve e të tjera, mirëpo mbeturinat, të gjithë e dimë, na ngulfat. Jo vetëm erë e keqe por edhe përhapje infeksionesh”, u shpreh një qytetar.
Disa banorë të tjerë, koshat e të cilëve tashmë ishin pastruar thonë se punonjësit komunal angazhohen varësisht kushteve dhe mjeteve që kanë në dispozicion.
“Për mbledhësit e mbeturinave nuk mund të them asgjë. Vërtet, vetëm me një kamion punojnë gjithçka. Vetëm me një kamion çfarë mund të mbërrijnë në gjithë këtë rrugë dhe tjetrën. Aq sa kanë mundësi punojnë”, deklaroi një qytetare.
Sipas drejtuesve të Higjienës Komunale, zbrazja e koshave realizohet rregullisht në të gjitha vendbanimet. Nga ky institucion thonë se vonesat mund të ndodhin vetëm në rast të defektit të ndonjë makine. /Alsat.mk
