Kryetari i Grupit Parlamentar në Partinë Demokratike Gazment Bardhi është takuar sot me eurodeputetin dhe Raportuesin e ri të Parlamentit Europian për Shqipërinë Andreas Schieder.
Nëpërmjet një postimi në rrjetet sociale Bardhi shkruan se “duke e falenderuar për mbështetjen që Parlamenti Europian ka dhënë për rrugëtimin e Shqipërisë në Bashkimin Europian, në emër të opozitës kërkova vëmendje të shtuar të Parlamentit Europian për situatën parazgjedhore në Shqipëri”.
Bardhi nënvizon më tej se “shkrirja e shtetit me partinë në zgjedhje, duke cenuar lirinë e zgjedhësve, është një nga shqetësimet kryesore të OSBE-ODIHR, që vijon të mbetet aty dhe i pazgjidhur”.
Gjithashtu, thekson Bardhi “përdorimi i parave të korrupsionit apo i krimit të organizuar në zgjedhje, është po ashtu një fakt evident që vijon të mbetet i pazgjidhur”.
“Shqipëria nuk mund të ketë kurrë një të ardhme europiane nëse nuk arrin të garantojë standardet minimale për zgjedhje të lira dhe të ndershme”, shkruan Bardhi.
Deputeti demokrat shkruan ndër të tjera se shqiptarët nuk kanë nevojë për një pushtet qorr në dorë të krimit dhe korrupsionit.
“Ata kanë nevojë për një Qeveri të përgjegjshme që del nga vota e lirë dhe u shërben vetëm qytetarëve, duke bërë realitet edhe ëndrrën për anëtarësim në Bashkimin Europian”, shkruan Bardhi.
