Kryetari i grupit parlamentar të Partisë Demokratike, Gazment Bardhi, deklaroi sot në Kuvend se “opozita do të qëndrojë fort për interesat e qytetarëve”.
Në nisje të sesionit të ri parlamentar, Bardhi listoi katër prioritete të Partisë Demokratike: reformën zgjedhore, rritjen e pensionit minimal në 300 euro, ligjin për caktimin e minimumit jetik dhe mbështetjen ndaj bujqësisë.
“Këtu duhet të fokusohemi ne. Ky duhet të ishte fokusi i këtij Kuvendi, jo klientelizmi. PD do të luftojë për Shqipërinë e shqiptarëve, jo për Shqipërinë e një grushti pushtetarësh. Do të luftojmë për Shqipërinë ku mund të jetohet dhe punohet me dinjitet, jo për Shqipërinë ku ligjin e bën më i forti dhe ku pasurimi kalon vetëm përmes korrupsionit”, u shpreh Bardhi.
Bardhi tha se “opozita do të qëndrojë fort për interesat e qytetarëve, në këtë sallë dhe jashtë kësaj salle, me qëllimin e vetëm që shqiptarët të kenë mundësi për të ndërtuar të ardhmen e tyre këtu”.
“Çfarë nismash ka marrë ky parlament në interes të qytetarëve? Zero! Ka ulur taksat? Jo! Përkundrazi, i ka rritur ato! Dhe e ka bërë barbarisht, me dhunë, me arrogancë, duke grisur Kushtetutën! Këto nuk janë fjalë! Janë akte publike të verifikuara nga Gjykata Kushtetuese së fundmi për taksën antikushtetuese të profesioneve të lira! Një betejë, që ne si opozitë e bëmë dhe e fituam, bashkë me qytetarët”, theksoi ai.
“Ne nuk jemi armiqtë tuaj, dhe ju nuk ka asnjë arsye të certifikoni veten si armiq të qytetarëve shqiptarë. Prandaj në këtë sesion uroj që kartonat si deputetë t’i ngremë vetëm për atë që jemi betuar. Për interesin publik, për qytetarët”, tha Bardhi duke iu drejtuar deputetëve të mazhorancës.
