Ministri i Mbrojtjes së, Pirro Vengu priti sot në një takim Shefin e Shtabit të Përgjithshëm të Forcave të Armatosura të Kroacisë, Gjeneral Lejtnant, Tihomir Kundid.
Takimi u zhvillua në një frymë pozitive dhe produktive, bëri të ditur Ministria e Mbrojtjes.
Takimi vjen në kuadër të nënshkrimit në Tiranë të “Deklaratës së Përbashkët e Bashkëpunimit në fushën e Mbrojtjes” ndërmjet Shqipërisë, Kroacisë dhe Republikës së Kosovës.
Dokumenti u firmos disa ditë më parë nga ministri i Mbrojtjes i Shqipërisë, Pirro Vengu, zëvendëskryeministri dhe ministri i Mbrojtjes i Kroacisë, Ivan Anušić, dhe ministri i Mbrojtjes i Kosovës, Ejup Maqedonci.
Bashkëpunimi synon forcimin e aftësive mbrojtëse të tri vendeve, zhvillimin e industrisë dhe teknologjisë së Mbrojtjes, si dhe përmirësimin e ndërveprimit ushtarak në rajon.
Ky zhvillim strategjik pasqyron aleancën e ngushtë mes tri shteteve, të lidhura nga historia, sakrificat për liri dhe një vizion i përbashkët për një të ardhme të sigurt.
Gjithashtu, Shqipëria dhe Kroacia do të punojnë ngushtësisht për unifikimin e qëndrimeve politike në mbështetje të aspiratave të qytetarëve të Kosovës për integrim të plotë në strukturat rajonale dhe euroatlantike.
