27 vjet më parë, forca të Policisë serbe kryen sulmin e dytë mbi familjen Jashari në Prekaz. Sulmi filloi ende pa zbardhur dita. Atë ditë, komandanti Adem Jashari nuk ndodhej në shtëpi, ndërsa sulmeve u bënin rezistencë, Shabani e Hamza.
I biri i Hamzës, Bekim Jashari, tregon si kishte ndodhur sulmi i 22 janarit.
“Është bërë një luftë 45 minutëshe. Babai me Selveten dhe Ilirianën nga shtëpia, gjyshi me Fitimin, Besimin, Kushtrimin, Igballen e Blerimin nga kulla. Në atë ngjarje është plagosur motra Selvetja dhe vajza e Rifatit e cila sot ëhstë gjallë, Iliriana”, tregoi ai.
Edhe 27 vjet pas sulmit, Prekazi vizitohet nga fëmijë e pleq. Jashari, ka treguar një rrëfim kur dera e xhaxhait të tij, Rifatit atëbotë ishte e hapur për ngushëllime. I humba 60, por i fitova 7 milion shqiptarë, kishte thënë ai.
“Mixha Rifati e ka thënë, ende sa ka qenë duke e mbajtur të pamen për familjen pas rënies. I pati thënë një nga vizitorët, ‘o baca Rifat a po mundesh të mbahesh. ‘Po mbahem, se i dhashë gjashtëdhjetë, po i fitova 7 milionë shqiptarë”, rrëfen Jashari.
