Tiranë, 19 maj, Zhurnal.mk – Kreu i Partisë Demokratike, Sali Berisha, u ka “bllokuar” pushimet verore të tijve, pasi thotë se opozita do të vijojë betejën kundër “mafies më të rrezikshme në Evropë”.
Ai shtoi se opozita, sipas tij, i ka shpallur luftë mafies në emër të shtetit ligjor dhe për këtë arsye “nuk mund të ketë asnjë pushim”.
Ndaj dhe ne, që i kemi shpallur luftë mafies në emër të shtetit ligjor, nuk mund të kemi asnjë pushim. Betejë, betejë dhe vetëm betejë”, tha Sali Berisha.
Ndërkohë sa i takon zgjedhje brenda PD, ai e cilësoi procesin si “formën më demokratike” të zgjedhjes së një lideri politik, ndërsa tha se me këtë votim mbyllet procesi për zgjedhjen e kryetarit të PD-së.
Ai u ndal edhe te mungesa e kandidatëve të tjerë në garë, duke deklaruar se në shumicën e rasteve kur në garë është kryetari aktual, rivalët zgjedhin të mos përfshihen për shkak të pasigurisë për rezultatin.
Sipas Berishës, shumë parti politike në botë nuk e zgjedhin kryetarin me parimin “një anëtar-një votë”, por përmes forumeve apo aklamacionit.
“Me datën 23, anëtarët e PD janë të ftuar në një proces ‘një anëtar-një votë’ të shprehin votëbesimin e tyre për Sali Berishën. Dhe me këtë mbyllet në votimin më transparent procesi i zgjedhjes së kryetarit të PD. Ky proces, duhet të sqaroj, i cili u përfol nga ligësitë në mënyrën më të papërmbajtur, shënon formën më demokratike, procesin më demokratik të zgjedhjes së një lideri partie.
Por, natyrisht prania e kandidatëve është diçka shumë e mirëpritur në këtë proces. Por e vërteta është se në 75 përqind të rasteve kur në garë është kryetari, për fat jo të mirë, të tjerët nuk hyjnë në garë. Pse nuk hyjnë në garë? Jo se nuk mund të hyjnë në garë, mund të hyjnë plotësisht, por sepse nuk dëshirojnë të angazhohen në një garë që nuk kanë të sigurt rezultatin.
Dhe kjo nuk është vetëm në Shqipëri, kjo është në Evropë dhe në botë. Kjo është statistika e kësaj lloj gare.
Shumica e partive politike në botë nuk e zgjedhin me ‘një anëtar-një votë’ kryetarin, e zgjedhin me forume, e zgjedhin gjer me aklamacion, me duartrokitje dhe merret si ekuivalent vote”, tha Berisha.
