Kryetari i Partisë Demokratike Sali Berisha zhvilloi sot një takim me minatorët në Bulqizë. Gjatë fjalës së tij, kreu i PD-së tha se “trajtimi mjekësor për minatorët do jetë krejtësisht i veçantë, sipas profilit të minierave”.
“Do mbrohet me çdo kusht shëndeti juaj. Minierat kanë grimcat, është e njohur. Pra, shëndeti i minatorit do ketë një përparësi të madhe”, tha Berisha.
Berisha tha po ashtu se renta minerare do t’i mbetet komunitetit lokal.
“Ne futëm për herë të parë rentën sepse ne jemi parti e taksave të ulëta. Ajo taksë të ngelej për Bulqizën, për shkollat, për qendrën shëndetësore. Dhe marrëveshja ndërkombëtare e Shqipërisë për rentën ka këtë përcaktim”, u shpreh Berisha.
“Renta u vendos mbi një kuadër ndërkombëtar të OKB, sipas të cilës ajo duhet të merret dhe t’u jepet autoriteteve lokale për nevoja. Këta e grabisin, e marrin vetë. Merr fund ajo. Renta do i mbetet komunitetit lokal”, tha Berisha.
Berisha shtoi se “Made in Albania” është shtylla e dytë kryesore e prodhimit tonë”.
“Dhe ne mund të nxjerrim minerale ndoshta më shumë se çdo vend tjetër në Ballkan. Askush nuk ka shumëllojshmërinë e mineraleve dhe minierave tona. Jo vetëm do i nxjerrim, por do i shndërrojmë më pasuri dhe mirëqenie për ju”, tha Berisha.
