Një ditë pas zhvillimit të zgjedhjeve parlamentare, kryetari i Partisë Demokratike Sali Berisha në një deklaratë për mediet tha sot se duhet të mbrohet çdo votë, duke theksuar se “çdo votë kundër regjimit meriton nderimin më të madh”.
Berisha tha duhet të vlerësohet çdo votë në kuti që të mos ketë asnjë ndikim.
Sipas Berishës “për PD-në, procesi elektoral është procesi themelor i një shoqërie të lirë dhe i njerëzve të lirë”.
“Pra, është procesi më serioz. Në këtë kontekst jam këtu së pari, për të shprehur mirënjohje, falënderim të madh për të gjithë ata komisionerë, vëzhgues, numërues që e gdhinë gjatë natës duke numëruar votat e qytetarëve”, tha Berisha.
Së dyti, shtoi Berisha, “u bëj thirrje të gjithë strukturave të PD, komisionerëve, vëzhguesve, kandidatëve, drejtuesve, që të bëjnë gjithçka që të numërohet çdo votë me përkushtimin më të madh, sepse çdo votë kundër regjimit meriton nderimin më të madh dhe vlerësimin më të madh”.
“Unë këtë kisha qëllimin tim të paraqitjes para jush, në mënyrë që të përsëris edhe një herë, një thirrje për demokratët, opozitarët të tregojnë përkushtimin dhe seriozitetin tonë maksimal në numërimin dhe vlerësimin e çdo vote të hedhur në kuti dhe të mos kenë asnjë ndikim nga asgjë”, theksoi Berisha.
Sipas Berishës kjo është detyra më e rëndësishme për demokratët sot.
