Kryetari i Partisë Demokratike, Sali Berisha, gjatë një konference për mediet foli në lidhje me situatën brenda PD-së dhe vonesat e analizës pas zgjedhjeve të 11 majit.
Berisha informoi se analiza u shty pasi pritej raporti përfundimtar i OSBE/ODIHR dhe se PD ka arritur ta damkosë farsën zgjedhore në arenën ndërkombëtare. Sipas tij, pritet nisja e një procesi të gjerë ringritjeje të PD-së në bazë.
“Vonesa e analizës, e diskutimit në parti për farsën elektorale dhe grabitjen e zgjedhjeve, ka pasur vetëm një shkak madhor, dhe ky shkak ka qenë pritja e publikimit të raportit përfundimtar të OSBE-ODIHR. Ka qenë paraqitja para publikut shqiptar dhe ju jeni dëshmitar, që nga data 15 maj dhe pas, çdo ditë të fakteve dhe dokumenteve të pakundërshtueshme të cilat rrëzonin, ose faktonin për çdo shqiptar dhe botën, farsën elektorale të 11 majit”, u shpreh Berisha.
“Kam deklaruar se do të mbroj votën. PD do të mbrojë votën dhe PD e mbrojti votën. Nuk mbrohet vota me kallashnikov, vota u damkos si farsë”, tha Berisha.
Berisha tha “ia dolëm me qindra e mijëra dokumente, duke paraqitur para zyrave përkatëse të faktojmë se kjo ishte një farsë”.
Kreu i PD-së shtoi se “sapo u ktheva nga Sao Paolo, punimet e asamblesë së përgjithshme të Internacionales Demokrate të Qendrës, në të cilën zgjedhjet në Shqipëri u damkosën siç janë. Terrori dhe dhuna politike ndaj pluralizmit mori ndëshkimin që meritoi”.
Berisha shtoi se “ka filluar debati në bazë, janë krijuar grupet e punës, është formuluar udhëzuesi dhe mbi bazën e tij në të gjithë PD-në do të bëhet një diskutim me synimin më kryesor të një forcimi të kësaj partie për betejën vendimtare kundër narkoregjimit”.
“Kështu që jam plotësisht i vetëdijshëm se demokratët e presin këtë, por tek demokratët shkohet tani me ato që thashë. Zgjedhjet, për fat të mirë u arrit të mos ndryshohet raporti, për të mos thënë tjetrën që qeveria e SHBA-së jo që nuk i dërgoi urim, por nëpërmjet zëdhënësit tha se, ato nuk ishin zgjedhje të lira. Dhe kjo kishte vlerën e vet të veçantë, të madhe”, shtoi Berisha.
Berisha garantoi anëtarët dhe mbështetësit e PD për angazhimin në një proces të fuqishëm ringritje për betejën vendimtare kundër narkoshtetit.
