Tabloidi gjerman “Bild” i ka bërë Shqipërisë një superpromovim ndërkombëtar mediatik.
“Bild” e rendit Shqipërinë në krye të listës së destinacioneve për të udhëtuar gjatë këtij viti.
Kryeministri Edi Rama, ndau sot në rrjetet sociale artikullin e revistës gjermane.
“Superpromovim ndërkombëtar mediatik nga tabloidi gjerman “Bild” që na rendit në krye të listës së destinacioneve për të udhëtuar gjatë këtij viti”, shkruan Rama.
“356 mijë vizitorë nga Gjermania kanë udhëtuar drejt Shqipërisë deri në nëntor, ndërsa po përgatitemi që gjatë muajit mars të prezantohemi si fytyra e ITB Berlin 2025, panairit më të madh në botë për turizmin”, vijon Rama.
Shqipëria ka marrë ftesën për të qenë vendi i nderit për vitin 2025, si një promovim i jashtëzakonshëm global për Shqipërinë turistike. Puna ka filluar që në korrik të vitit 2023, sepse kërkon përgatitje shumë të gjatë, është një program 1-vjeçar, i cili ka nisur që në mars 2024.
International Travel Trade Show (ITB) është ekspozita kryesore tregtare në botë e udhëtimeve dhe ofron një mundësi unike për të mësuar rreth vendeve dhe rajoneve të ndryshme në të gjithë globin të mbledhura në një vend të vetëm.
Revista në artikullin e saj ka në fokus rivierën shqiptare, si një risi që po shkëlqen në Mesdhe.
“Shqipëria nuk është më një e panjohur, por në vitin 2025 do të bëhet një destinacion trend për kërkuesit e diellit dhe adhuruesit e plazhit. Uji i kristaltë, gjiret e vogla dhe fshatrat simpatikë bregdetarë si Ksamili dhe Himara tërheqin vizitorët në Rivierën Shqiptare. Ndryshe nga rajonet e mbipopulluara të Mesdheut, ju mund të gjeni plazhe të qeta dhe të shijoni natyrën”, shkruan në hyrje të artikullit të saj revista “Bild”.
