Kantautori 76-vjeçar Billy Joel ka anuluar të gjitha datat e ardhshme të turneut pas diagnostikimit me Hidrocefalinë me Presion Normal (NPH), një gjendje e rrallë që shkaktohet nga grumbullimi i lëngut në tru dhe sjell probleme me dëgjimin, shikimin dhe ekuilibrin.
Në një deklaratë, Joel njoftoi se po merr kujdes të shkëlqyer dhe është plotësisht i përkushtuar të përqendrohet në shëndetin e tij.
Ai ka anuluar 17 shfaqje për vitet 2025 dhe 2026, përfshirë koncertet në Murrayfield (Edinburg) dhe Anfield (Liverpool), shkruan BBC.
Gjendja e tij u përkeqësua pas performancave të fundit, dhe mjekët i kanë rekomanduar pushim dhe terapi fizike.
Joel falënderoi fansat për mirëkuptimin dhe mbështetjen, duke shprehur dëshirën për t’u rikthyer në skenë.
NPH prek më së shumti njerëzit mbi 60 vjeç dhe është pak e kuptuar. Përveç Britanisë së Madhe, Joel ishte planifikuar të performonte edhe në SHBA dhe Kanada nga korriku 2024 deri në korrik 2026. Ai kishte shtyrë më parë disa shfaqje për shkak të një operacioni dhe terapie fizike.
Billy Joel ka qenë aktiv në turne në vitet e fundit dhe përfundoi një rezidencë rekord 10-vjeçare në Madison Square Garden vitin e kaluar.
Ai është fitues i pesë çmimeve Grammy dhe anëtar i Sallës së Famës së Rock and Roll që nga viti 1999.
