Kryetarja e Komisionit të Çështjeve Europiane, Jorida Tabaku, i ka uruar mirëseardhjen Sekretarit Amerikan të Shtetit, Blinken, i cili vjen për herë të parë sot në Shqipëri.
Teksa vlerëson marrëdhëniet Shqipëri-SHBA, Tabaku shprehet se duhet të ngrihemi në një tjetër nivel për të tërhequr investimet amerikane.
Ajo thekson se mbështetja e SHBA në këto momente kritike për vendin është jetike dhe e domosdoshme.
Sipas Tabakut është gjithashtu jetike lufta kundër korrupsionit, zhvillimi ekonomik, përpjekja për një drejtësi që funksionon, një parlament eficent dhe synimi duhet të jetë forcimi i marrëdhënieve tregtare.
“Vizita e sotme e sekretarit Blinken është një shenjë e qartë e këtij bashkëpunimi që përditë e më shumë forcohet. Në fundin e diktaturës më të egër në Europë, sekretari Baker ishte njeriu që solli erën e ndryshimit në një vend të etur për liri. Ka qenë SHBA që mbështeti procesin e integrimit dhe më tej shtytësja kryesore e hyrjes në NATO.
Qe pikërisht presidenti Bush që shqiptoi realitetin e pavarësisë së Kosovës nga Tirana që i dha jetë ëndrrës së shqiptarëve, një ëndërr e mundësuar nga ndihma e presidentit Clinton në vitin e vështirë të 1999. Qe urtësia dhe angazhimi i SHBA në marrëveshjen e Ohrit që i dha mundësinë një kryeministri shqiptar të jetë në krye të Maqedonisë së Veriut”, shkruan ndër të tjera Tabaku.
