Shkup, 3 shtator – Ndriçimi publik është një nga parakushtet më të rëndësishme për një jetë dinjitoze dhe sigurinë e qytetarëve, por gjendja në Komunën e Çairit është alarmante. “Të tëra pjesë të rrugëve, parqeve dhe hapësirave publike janë lënë në errësirë. Nga Bit pazari dhe rr. Xhon Kenedi, përmes Topanës, Çarshisë së Vjetër dhe Seravës, qytetarët tanë çdo mbrëmje lëvizin nëpër rrugë të pasigurta, në një atmosferë frike dhe pasigurie,” deklaroi Bujar Osmani.
Ai theksoi se problemi nuk është vetëm teknik, por edhe thellësisht simbolik. “Kjo është simbol i moskujdesit dhe paaftësisë së pushtetit komunal gjatë njëzet viteve të fundit. Në vend të dritës dhe sigurisë, Çairi u la në terr, në kuptimin literal dhe metaforik,” tha Osmani, duke shtuar se më shumë se 40% e deitave ekzistuese nuk funksionojnë, se sistemi mbështetet në teknologji të vjetëruar prej dy dekadash dhe se prokurimet publike janë realizuar pa vizion dhe transparencë. “Shkollat, fushat sportive dhe hapësirat publike mbesin në hije, gjë që rrezikon sigurinë e fëmijëve, grave dhe personave të moshuar,” theksoi ai.
Në fjalimin e tij, Osmani paraqiti edhe programin e tij për ndryshim. “Si kryetar i ardhshëm i Çairit, do të filloj me zëvendësimin e plotë të infrastrukturës së vjetruar dhe kalimin në ndriçim modern LED, me çka do t’i ulim shpenzimet e energjisë elektrike mbi 60%. Do të sigurojmë mbulim për të gjitha hapësirat publike, përparësi do të kenë oborret e shkollave, fushat sportive, tregjet, parqet dhe kalimet për këmbësorë. Do të fusim një sistem modern për menaxhim në distancë dhe detektim të shpejtë të defekteve. Të gjitha prokurimet dhe shpenzimet do të jenë të qasshme publikisht, ndërsa qytetarët do të mund të raportojnë problemet përmes një aplikacioni mobil dhe linje telefonike, me garanci se do të reagohet brenda 48 orëve,” paralajmëroi ai.
“Me këtë program, Çairi më në fund do të shkëlqejë. Do të ndërtojmë një sistem që nuk është vetëm ndriçim, por simbol i një fillimi të ri, i sigurisë dhe i besimit. Është koha ta nxjerrim Çairin nga errësira dhe t’i japim një të ardhme të ndritshme,” porositi Osmani.
