Charlize Theron, edhe në moshën 49-vjeçare, vazhdon të mahnitë me bukurinë dhe pamjen e saj rinore. Në një intervistë të fundit për revistën Modern Luxury, ajo ka ndarë një nga truket më të thjeshta, por më efektive për kujdesin ndaj syve
Bëhet fjalë për një truk bukurie, që secila mund ta provojë dhe nuk kushton asnjë qindarkë. Ja çfarë bën në të vërtetë Charlize Theron për ta ruajtur pamjen e shndritshme dhe rinore të lëkurës, sidomos në zonën përreth syve.
“Gjithmonë mbaj disa lugë në frigorifer dhe i nxjerr kur sytë më duken të fryrë dhe të lodhur në mëngjes. Janë zgjidhja perfekte për mëngjese kur më duhet një pamje e freskët”, ka zbuluar aktorja e famshme.
Kujdesi për zonën e ndjeshme rreth syve
Kjo metodë, e cila përdor të ftohtin për të reduktuar fryrjen dhe gjurmët e lodhjes, është bërë pjesë e pandashme e rutinës së saj të përditshme të kujdesit.
Lëkura rreth syve shpesh neglizhohet, edhe pse është një nga zonat më të ndjeshme të fytyrës. Kjo lëkurë është më e hollë, më delikate dhe priret të tregojë e para shenjat e lodhjes, stresit dhe plakjes. Ekspertët theksojnë se kujdesi i duhur për këtë zonë nuk është luks, por domosdoshmëri, po aq i rëndësishëm sa serumi ditor apo kremi mbrojtës me SPF, transmeton Telegrafi.
Në rutinën e mbrëmjes rekomandohen formula më të pasura për rigjenerim të thellë të kësaj zone të ndjeshme. Hapat kryesorë përfshijnë pastrim të plotë, përdorimin e serumit me acid hialuronik, vitaminë C, kafeinë ose retinol, si dhe kremra cilësorë për sy. Kujdes i veçantë duhet treguar edhe për mbrojtjen nga dielli, pasi shumë marka tashmë kanë zhvilluar kremra specifikë me SPF për zonën rreth syve.
Përveç lugëve të ftohta, rolerët e mbajtur në frigorifer mund të ndihmojnë po ashtu për të reduktuar fryrjen dhe për të stimuluar qarkullimin e gjakut. Rekomandohet edhe përdorimi herë pas here i maskave ose i patch-eve për sy, sidomos para ngjarjeve të rëndësishme apo pas netëve pa gjumë. Gjithashtu ndihmojnë edhe pajisjet me dritë LED, si drita e kuqe, që stimulojnë prodhimin e kolagjenit dhe përmirësojnë elasticitetin e lëkurës.
Megjithatë, sekreti i vërtetë i një pamjeje të shndritshme qëndron tek baza: gjumi cilësor, hidratimi i rregullt dhe një ushqyerje e balancuar. Zona rreth syve është shpesh e para që tregon shenjat e lodhjes dhe stresit, ndaj është me rëndësi të dëgjojmë se çfarë na thotë trupi.
