Përfaqësuesit e BE dhe OKB në Tiranë u takuan dje në “Europe House” për takimin e tyre vjetor mbi rritjen e partneritetit dhe bashkëpunimit të tyre në reformat kryesore në Shqipëri.
Delegacioni i BE në Tiranë bëri të ditur se në këtë takim u diskutua mbi ndërtimin e një shoqërie të drejtë dhe gjithëpërfshirëse, mbështetjen e Shqipërisë në modernizimin e ekonomisë së saj, mbrojtjen e të drejtave të njeriut dhe sundimi i ligjit, sigurimin e qëndrueshmërisë mjedisore.
“Bashkimi Evropian është donatori më i madh i Shqipërisë në këto fusha dhe ne vlerësojmë partneritetin me agjencitë e OKB-së në zbatimin e disa prej programeve tona kryesore”, thekson Delegacioni i BE-së.
Delegacioni i BE shton se, “në periudhën e ardhshme, së bashku me qeverinë, ne duam të sigurojmë që procesi i anëtarësimit në BE të mbetet transparent dhe gjithëpërfshirës, në mënyrë që të gjithë qytetarët të ndjejnë se janë pjesë e tij, duke mos lënë askënd pas”.
